Fota Nadziei Bužan
Spravu viadzie sudździa Vital Siniła, bok dziaržabvinavačańnia padtrymlivaje Michaił Razuvajeŭ.
Siarhieju Buraku staviać u vinu toje, što jon z 10 vieraśnia pa 8 śniežnia 2020 hoda sa svajho mabilnaha telefona apublikavaŭ u telehram-kanale «Masty dla žyćcia čat» stvoranyja inšymi karystalnikami malunki z vyjavaj Łukašenki i abraźlivym tekstam.
Hetyja dziejańni Siarhieja Buraka kvalifikavanyja pa art. 368 Kryminalnaha kodeksu — «Abraza prezidenta».
Taksama mužčynu abvinavačvajuć u tym, što jon 21 listapada 2020 hoda ŭ telehram-kanale «Masty dla žyćcia čat» źmiaściŭ paviedamleńnie z vyjavaj nacysckaj svastyki, jakaja składajecca z elemientaŭ dziaržaŭnaha ściaha Biełarusi, čym «prademanstravaŭ abraźlivaje i bluźnierskaje staŭleńnie da dziaržaŭnaj simvoliki» (art. 370 KK).
Siarhiej Burak svaju vinu nie pryznaŭ. Sudu patłumačyŭ, što sam nie stvaraŭ karykatury, a rabiŭ tolki reposty vyjaŭ, stvoranych inšymi karystalnikami. Nie ličyć zroblenyja publikacyi abrazaj.
Nie pamiataje, kab raźmiaščaŭ ściah sa svastykaj. Adnak zajaviŭ, što na stadyi śledstva pad ciskam kazaŭ inakš.
Sudździa ŭdakładniŭ, jaki kankretna cisk akazvali. Dziaržabvinavaŭca skazaŭ, što treba było pisać zajavu na słužbovuju asobu, što akazvała cisk.
Siarhiej Burak: Psichałahičny cisk.
Dziaržabvinavaŭca: Śledčy?
S.B.: Mahčyma.
H.: Što značyć mahčyma? Navošta vy tady zajaŭlajecie pra heta? Adkažycie, chto.
S.B.: Dla mianie nastupstvy buduć niadobryja, kali ja heta skažu, tamu što ŭsich zapałochali. Ja bajusia heta skazać.
H.: Chto kaho zapałochaŭ? Dapuścim mianie nichto nie pałochaŭ.
S.B.: Mianie pałochali. I nie tolki mianie. Ja admaŭlajusia adkazvać na hetaje pytańnie. Ściah hety nie raźmiaščaŭ.
Abvinavačany skazaŭ, što nie razumieŭ, što raźmiaščaje niešta abraźlivaje, ličyŭ ilustracyi siabroŭskim šaržam:
«Raniej časopis «Krakadził» byŭ, tam usio drukavali, i heta było ŭsio lehalna».
Dziaržabvinavačańnie ličyć, što šarž musić mieć humarystyčny składnik.
— U čym tut humar i satyra? Kali b vas taksama nazvali «vusataj š*araj», vy b nie abrazilisia?
— Ja b zadumaŭsia, kali b usie pra mianie tak skazali. Ja samakrytyčny. Kali b na mianie tak skazali, ja b šukaŭ prablemu ŭ sabie, značyć, niešta nie tak sa mnoj. Prablema ŭva mnie, kali ŭvieś śviet suprać mianie. Ja tak razumieju heta.
— Davajcie taki prykład: vy raźmiaścili statyčnuju vyjavu asobaŭ u formiennym abmundziravańni z tekstam «Biełaruś, 21 stahodździe: AMAP zahaniaje pracoŭnych na zavody». Dzie vy bačyli, kab AMAP zahaniaŭ rabočych na zavod? Vy heta bačyli? U čym tut humar vyjaŭlajecca? Satyra tut jakaja?
— Čutkami poŭnicca ziamla. Usio zasnavana na razmovach ź siabrami, jakija raspaviadali, što bačyli.
— Možacie nazvać ich?
— Nie, nie mahu.
U sudzie byŭ dapytany ŭ jakaści śviedki opierupaŭnavažany Mastoŭskaha RAUS Pavieł Siviec. Jon skazaŭ, što było vyjaŭlena kala 400 paviedamleńniaŭ, raźmieščanych Siarhiejem Burakom.
Abvinavačany ŭdakładniŭ, čamu padčas pieratrusu paniatyja byli «z baduna i ź finhałam», čamu nie pryviali susiedziaŭ, kali ab hetym prasili. Na heta śviedka adkazaŭ: chto zhadžajecca, taho i pryvodziać.
U sprečkach bakoŭ dziaržabvinavaŭca zaprasiŭ pa dvuch pradjaŭlenych artykułach abvinavačvańnia pryznačyć dla Siarhieja Buraka pakarańnie ŭ vyhladzie abmiežavańnia voli z nakiravańniem u papraŭčuju ŭstanovu adkrytaha typu na 2 hady. Dovady pra cisk na abvinavačanaha ličyć hałasłoŭnymi i ničym nie paćvierdžanymi.
Sud ahučyć rašeńnie 7 červienia ŭ 15.30.
