Uładzimir Kniha na fota źleva
Pracavaŭ u milicyi, byŭ sudzimy za pieravyšeńnie ŭłady, vychoŭvaje dvaich dziaciej
Knihu dapytali pad kaniec sudu, paśla dopytu abvinavačanaha Furmanava, usich paciarpiełych i śviedak, a taksama paśla razhladu piśmovych materyjałaŭ spravy. Na ŭsie pasiedžańni pa «spravie Cichanoŭskaha» prychodziać pa niekalki dziasiatkaŭ čałaviek, kab padtrymać fihurantaŭ. U nievialikaj zali zvyčajna źmiaščajucca nia ŭsie.
Uładzimieru Knihu 39 hadoŭ. Jon žanaty, maje dvaich niepaŭnaletnich dziaciej. Jaho zatrymali padčas pikietu Śviatłany Cichanoŭskaj u Horadni 4 červienia. Jon byŭ valanteram u kamandzie Cichanoŭskaj. Palitviaźniem jaho nie pryznali. Knihu vinavaciać u arhanizacyi biesparadkaŭ i hvałcie nad milicyjantami.
Raniej Kniha słužyŭ u milicyi, u patrulna-pastavoj słužbie specyjalnaha pryznačeńnia, ale nie ŭ AMAPie. U 2012 hodzie jaho asudzili za pieravyšeńnie ŭłady. U 2014 hodzie jon vyzvaliŭsia. Na siońnia taja sudzimaść pahašanaja. Apošnim časam pracavaŭ kiroŭcam śmiećciavoza. Paśla vyzvaleńnia kantaktavaŭ ź niekatorymi supracoŭnikami milicyi. Kaža, što niepryjazi da milicyjantaŭ nie adčuvaŭ.
Pavodle dziaržaŭnaha abvinavačańnia, Kniha razam ź inšymi praź internet zaklikaŭ parušać paradak. Nibyta jon prymaŭ udzieł u arhanizacyi masavaha mierapryjemstva pad vidam pikietu 29 traŭnia ŭ Horadni, kab vykazać svaje palityčnyja intaresy, abvastryć napružanaje stanovišča ŭ krainie, «z matyvaŭ palityčnaj i idealahičnaj varožaści». Z aficyjnaj versii vynikaje, što hetaje mierapryjemstva hruba parušała paradak, pieraškadžała pracy transpartu.
Knihu taksama vinavaciać u tym, što jon udaryŭ kamandzira hrupy AMAPu Dźmitryja Rachunka pa tułavie, potym strymlivaŭ jaho za formiennaje adzieńnie, adciahvaŭ Rachunka ad Siarhieja Cichanoŭskaha. Niekalki ŭdaraŭ nibyta nanios kamandziru hrupy AMAP Viktaru Budniku, u tym liku pa hałavie. Taksama jon ža, zhodna z abvinavačańniem, pieraškadžaŭ pasadzić Cichanoŭskaha ŭ słužbovy transpart.
«Nie znajomy ź Cichanoŭskim, ale znaju jaho»
Padčas dopytu Kniha nazyvaje ŭsich pa imieni i imieni pa baćku, chacia ŭ pytańniach hučać tolki proźviščy. Milicyjantaŭ i inšych udzielnikaŭ mituśni na Savieckaj płoščy ŭ Horadni letaś 29 traŭnia jon nazyvaje «persanažami».
— Ci znajomyja vy ź Siarhiejem Cichanoŭskim? — pytajecca prakuror Mikita Myśliviec.
— Nie znajomyja, ale znaju jaho, — adkazaŭ Kniha.
Jon hladzieŭ roliki Cichanoŭskaha na YouTube-kanale. Prychodziŭ na sustreču z błohieram u horadzienskim parku Žylibera letaś 26 krasavika, vykazvaŭsia na joj.
Sud cikaviła, jak Kniha paznajomiŭsia ź inšymi fihurantami spravy, ź Cichanoŭskim; chto da kaho pieršy padyšoŭ, ź jakimi słovami; jakuju jon rolu hraŭ u kamandzie; jak kantaktavaŭ; ad kaho atrymlivaŭ infarmacyju.
Jašče z adnym fihurantam, Jaŭhienam Raźničenkam, Kniha paznajomiŭsia, kali pačali stavić pikiety dla zboru podpisaŭ za Cichanoŭskuju. Abodva byli valanterami. Kniha sam prapanavaŭ dapamohu. Staviŭ namiot, raskładaŭ inventar. Hrošaj jamu nichto za heta nie płaciŭ.
Sa Źmitrom Furmanavym Kniha paznajomiŭsia, tolki kali ich razam vieźli na «Vaładarku». Alaksandra Aranoviča, jakoha asobna sudziać taksama pa «spravie Cichanoŭskaha», Kniha znaje tolki z materyjałaŭ spravy. Pra pikiety Kniha daznavaŭsia z adkrytych krynic u internecie.
29 traŭnia minułaha hodu jon pryjšoŭ na Savieckuju płošču prykładna ŭ 19:40, niezadoŭha da taho, jak «pačałasia ŭsia hetaja niezrazumiełaja kaniciel, kali persanažy prylacieli».
Kniha chacieŭ paznajomicca ź Cichanoŭskim, pahutaryć, papić kavy, ale nie paśpieŭ. Jon čakaŭ, kali błohier vyzvalicca ad razmovaŭ z mnostvam ludziej.
— Vy bačycie roźnicu pamiž pikietam i mitynham? — udakładniŭ prakuror.
— Plakataŭ nie było. Nichto nie vyhukvaŭ palityčnyja lozunhi, — upeŭniena adkazaŭ Kniha.
«Kali ŭ vas z formy prybrać pahony, to chto vy budziecie?»
Fihurant nia bačyŭ pačatku kamunikacyi Cichanoŭskaha z «žančynaj u kiepcy». Ale bačyŭ paciarpiełych milicyjantaŭ Kazłoŭskaha (jaki padaŭ) i Chvaleniu (jaki chadziŭ z ruparam).
«Byli persanažy ŭ milicejskaj formie, jakija mitusilisia tudy-siudy. Było adčuvańnie, što jany nia viedali, što šukać. Pierasoŭvalisia drobnymi pierabiežkami», — apisaŭ ich Kniha.
Fihurant raskazaŭ, što, na jahonuju dumku, natoŭp stvaryli štučna. Niejkija ludzi pačali kryčać i šturchacca.
«Ja pracavaŭ u MUS, mahu adroźnić pravakacyju ad sapraŭdnaj sytuacyi… Ja byŭ u šoku ad hetych padziej. Ja paznaŭ mnohich ludziej, jakija dahetul pracujuć u struktury MUS. Jany stajali ŭ čarzie, kab pastavić podpis za Cichanoŭskuju. Heta abo stvareńnie masavaści, abo hramadzianskaja pazycyja», — prakamentavaŭ Kniha.
Jon patłumačyŭ, što pajšoŭ za natoŭpam praz «instynkt natoŭpu», jak «raziavaka», bo było cikava, što adbyvajecca.
«Pryjechaŭ «viasielny kartež». Pavyskokvali persanažy. Paŭsiadzionnaja letniaja forma [pavinna być] koleru chaki, a tut čornaja niezrazumiełaja forma. Kali ŭ vas, dziaržaŭny abvinavaŭca, z formy prybrać pahony, to chto vy budziecie?», — razvažaŭ Kniha pra milicyju, jakaja pryjechała na płošču na transparcie biez aznakaŭ i ŭ niezrazumiełaj dla jaho formie.
«Nia varta addavać ludziej prosta tak»
Fihurant bačyŭ, jak Cichanoŭskaha viaduć u bok kaviarni: «Vidać, kavaj chacieli pačastavać».
— Kniha, vy ździekujeciesia? — paśla čarhovaha takoha žartu ŭdakładniła ŭ abvinavačanaha sudździa Biekušava.
— Nie, vysoki sud, — surjozna adkazaŭ toj.
Kniha pabieh u toj ža bok, kudy viali Cichanoŭskaha, kab «zapytacca, što za biaźmiežža robicca». Pa darozie jon začyniŭ adčynienyja dźviery mikraaŭtobusa biez aznakaŭ.
«Padumaŭ, moža jon kavu pryvioz u kaviarniu ci hamburhiery. [Začyniŭ], kab natoŭp ničoha nia skraŭ. Ja ŭbačyŭ skučanaść. Biehli koni i ludzi», — patłumačyŭ padsudny.
Urešcie jon akazaŭsia ŭ centry «skučanaści». Amal nikoha sa svaich byłych kalehaŭ Kniha nie paznaŭ, bo tyja byli ŭ maskach. Adnak padčas hetaj mituśni niechta prymianiŭ da Knihi ŭdušalny pryjom amal u lažačym stanoviščy, a potym adpuściŭ. U bajca źlacieła maska, i Kniha paznaŭ u im amapaŭca Paŭła Trafimava. Pa «čyrvonych kapturkach» jon zrazumieŭ, što na płoščy byli i inšyja amapaŭcy.
Kniha asprečyŭ, što stasavaŭ da niekaha hvałt u toj mituśni. Admaŭlaŭsia, što zaklikaŭ raniej niekaha parušać paradak abo čynić hvałt u dačynieńni da milicyjantaŭ, abo što zaklikaŭ abaraniać Cichanoŭskaha, kali raptam jaho buduć zatrymlivać. Taksama jon asprečyŭ, što pieraškadžaŭ ruchu transpartu. Kniha pryznaŭ, što moh vypadkova dakranucca da amapaŭca Rachunka, ale tolki tamu, što začapiŭsia za bardziur i padaŭ.
«Čamu mianie nie zatrymali ŭ toj ža dzień, kali ja taki złosny chulihan?», — zadaŭ rytaryčnaje pytańnie Kniha.
Toje, što suprać jaho davali pakazańni, jon nazvaŭ ahavoram.
«Ludzi chočuć pieramien. Nia varta addavać ludziej prosta tak. Pra heta, mahčyma, dumaje kožny, ale skazać mohuć adzinki… Stolki techniki panajechała, stolki siłaŭ, kab zatrymać adnaho čałavieka. Heta što, akt zastrašvańnia? Maja dumka: jaho (Cichanoŭskaha. — RS) zatrymali biespadstaŭna, z parušeńniem usich zakonaŭ», — vykazaŭsia Kniha.
U sudzie pierapynak da 27 krasavika. Tady skončać dapytvać Knihu i, mahčyma, piarojduć da dopytu Raźničenki. Paśla planujucca sprečki, apošniaje słova i prysud.
