Alaksandr Hiedžadze pad kanvojem
U sudzie Frunzienskaha rajona 20 krasavika byŭ ahučany prysud pa kryminalnaj spravie ŭ dačynieńni da palityčnaha źniavolenaha, hramadzianina Rasii Alaksandra Hiedžadze. Palitviaźnia abvinavacili pa č. 1 art. 342 Kryminalnaha kodeksa (Hrupavyja dziejańni, jakija hruba parušajuć hramadski paradak). Sudździa Andrej Mlečka pakaraŭ jaho tryma hadami pazbaŭleńnia voli z adbyvańniem u kałonii ahulnaha režymu, paviedamlajuć pravaabaroncy.
Kryminalnaja sprava na Alaksandra Hiedžadze była zaviedziena za toje, što jon na karšerynhavym aŭto pieravioz pokryŭki, ź jakich potym na darozie ŭ žyłym kompleksie «Kaskad» byli zbudavanyja barykady. Heta adbyłosia ŭviečary 12 kastryčnika. U toj dzień na «Maršy piensijanieraŭ» u Minsku suprać pratestoŭcaŭ byli ŭžytyja haz, śvietłašumavyja hranaty i inšyja śpiecsrodki, i ŭ adkaz na heta ludzi ŭ mnohich rajonach stalicy vyjšli na viečarovyja akcyi pratestu.
Alaksandra zatrymali 27 kastryčnika, i da suda jon znachodziŭsia ŭ SIZA-1 na Vaładarskaha. Mužčynu pryznali palityčnym źniavolenym.
Hiedžadze svaju vinu pryznaŭ častkova. Na sudzie jon nie admaŭlaŭ, što pieravoziŭ pokryŭki, ale kazaŭ, što nie viedaŭ, dla čaho ich buduć vykarystoŭvać. Da pačatku słuchańniaŭ pa spravie palitviazień kampiensavaŭ pazoŭ ad MNS na pakryćcio škody ŭ pamiery 66,36 rubloŭ.
Prakuror zaprasiŭ pakarać palitviaźnia tryma hadami pazbaŭleńnia voli ŭ kałonii ahulnaha režymu. Mienavita taki prysud i vynies sudździa.
