Aleh Sukonka. Fota: Maksim Śližeŭski, TUT.BY
Aproč inšaha, Sukonka vykazaŭsia pra papiaredniaha ministra achovy zdaroŭja Uładzimira Karanika.
«Z Karanikam u nas asabistaja niepryjaź. Pryčym surjoznaja. Ja liču, što jon redki pieršaradny demahoh. Heta Kačanava jaho pryviała… Kali mianie prasili dać jamu charaktarystyku, ja skazaŭ: mahu napisać vialikimi litarami na papierčynie, ale heta budzie nieprystojnaje słova.
A kali jon pryjšoŭ u Ministerstva, mianie vykinuli biez prava pracaŭładkavańnia».
Doktar Sukonka taksama rezka raskrytykavaŭ utojvańnie statystyki zachvorvańnia na karanavirus: «Treba davać narmalnuju, pravilnuju, sumlennuju statystyku pa karanavirusie i ź jaje zychodzić. Nichto nie pavinien bajacca hetaj statystyki! Kolki ŭ nas pa-sapraŭdnamu ludziej chvoryja na kavid? Ni vy, ni ja nie viedajem dakładnaha adkazu.
— A vy ŭzdymali pytańnie pra statystyku ŭ viarchach?
— Ja nie prosta ŭzdymaŭ, a najechaŭ z hetaj nahody na ciapierašniaha i papiaredniaha ministraŭ achovy zdaroŭja. Ja pytaŭsia: dzie kanfierencyja pa vynikach pieršaj chvali karanavirusa? Čamu nie praviali, nie patłumačyli, nie zrabili vysnovy? Heta samaje važnaje — zrabić vysnovy, namiecić prahramu, zrazumieć, što rabić dalej. Karanavirus nikudy nie dzieniecca. … Treba viedać, ci budzie na ich dziejničać rasijskaja vakcyna abo nie. Heta vialikija daśledavańni! Treba hruntoŭna hetym zajmacca, strukturu vyznačyć, hrošy, tamu što heta tolki pačatak: dapuskaju, što karanavirus budzie i ŭ nastupnym hodzie, jon tolki źmienić svaju pryrodu.
Tak, u nas viaduć baraćbu z hetym virusam, ale treba, kab heta rabiłasia na najvyšejšym uzroŭni. Treba surjozna zajmacca prablemaj, a nie prosta tušyć pažar.
Ludzi pavinny viedać praŭdu! Tak było ŭ nas u ankałohii, kali ja pracavaŭ. My viali statystyku, dublavali jaje. U nas ža jość Nacyjanalny statystyčny kamitet…
— …iaki naohuł pierastaŭ publikavać źviestki pa śmiarotnaści.
— U nas usie pryvykli chavać, kab usio było nibyta cip-top. Ale ŭ nas niama ludziej, jakija zdolnyja skazać vysokamu načalstvu, što heta treba.
— Dyk vy ž sienatar, možacie ŭsio heta ahučyć na Usiebiełaruskim schodzie. I vy dobry pramoŭca.
— A ci varta?..
— Vy ž viedajecie pra adkryty list daktaroŭ, u jakim vystavili šerah surjoznych patrabavańniaŭ da ŭłady. Vy jaho padpisali?
— Nie padpisvaŭ i, ščyra kažučy, navat nie čytaŭ. Ja jak sienatar navat nie ŭmiešvaŭsia ŭ heta. Siadzieŭ cicha», — pryznaŭ doktar Sukonka.
