U Brusieli 16 śniežnia adbyłosia ŭručeńnie premii imia Sacharava za 2020 hod.
Jaje łaŭreatami stali dziesiać pradstaŭnikoŭ biełaruskaj demakratyčnaj supolnaści — Śviatłana i Siarhiej Cichanoŭskija, Śviatłana Aleksijevič, Maryja Kaleśnikava, Vieranika Capkała, Volha Kavalkova, Siarhiej Dyleŭski, Mikałaj Statkievič, Aleś Bialacki i Ściapan Puciła.
Śviatłana Cichanoŭskaja atrymlivaje ŭznaharodu
Hrašovaja častka ŭznaharody składaje 50 tysiač dalaraŭ. My pacikavilisia ŭ pres-sakratara Cichanoŭskaj Hanny Krasulinaj, kudy pojdzie častka hrošaj, jakija pryznačanyja Śviatłanie. «Hetaja premija naležyć usiamu biełaruskamu narodu, jaki zmahajecca za svaju svabodu. Naturalna, što ŭsie hrošy buduć pieradadzienyja na dapamohu paciarpiełym i represavanym», — adkazała Krasulina.
Były kiraŭnik stačkama MTZ Siarhiej Dyleŭski kaža, što pakul nie dumaŭ, kudy puścić hrošy. «Mahčyma, u niejki fond», — kaža jon. Dyleŭski ŭdakładniaje, što hrošy pakul nichto nie atrymaŭ i nieviadoma, kali dakładna atrymaje.
Premija «Za svabodu dumki» nazvanaja ŭ honar savieckaha dysidenta Andreja Sacharava, jana ŭručajecca ad 1988 tym ludziam i arhanizacyjam, jakija adznačylisia ŭ pytańniach pravoŭ čałavieka. Raniej premiju Sacharava atrymlivali Alaksandr Milinkievič i Biełaruskaja asacyjacyja žurnalistaŭ.
