BiełTA
Alaksandr Łukašenka sustreŭsia siońnia z apostalskim nuncyjem u Vialikabrytanii arcybiskupam Kłaŭdya Hudžeroci, piša BiełTA.
Kłaŭdya Hudžeroci zajmaŭ pasadu apostalskaha nuncyja ŭ Biełarusi ŭ 2011-2015 hadach. Na hety raz jon pryjechaŭ u Minsk jak śpiecpasłańnik Papy Rymskaha Franciška.
«Ja vielmi rady, što Jaho Śviataść Papa Francišak nakiravaŭ vas u Biełaruś. Mnie pryjemna z vami sustrecca, u mianie dobryja ŭražańni zastalisia ad sustreč, pieramovaŭ, razmoŭ z vami, kali vy słužyli tut. I ja zaŭsiody kazaŭ, što ciapierašni Papa Rymski Francišak, z majho punktu hledžańnia, heta narodny čałaviek. Heta mianie vielmi vabić», — zajaviŭ Alaksandr Łukašenka.
Łukašenka paprasiŭ Kłaŭdya Hudžeroci pieradać Papu Francišku samyja ciopłyja vinšavańni z Novym hodam i pažadańni mocnaha zdaroŭja. «Kali zachvareje, chaj nie pieražyvaje: my hatovyja pryniać jaho na lačeńnie, my ŭmiejem lačyć. Ale ciapier lepš nie chvareć. I Kalady tut, Novy hod, śviaty — chvareć nam niekali. Ale kali što — adrazu da nas», — z humaram adznačyŭ jon.
Arcybiskup zapeŭniŭ, što abaviazkova pieradaść hetyja słovy Papie Rymskamu. Pavodle jaho słoŭ, kiraŭnik Katalickaj Carkvy chacieŭ sustrakać kaladnyja śviaty razam ź viernikami, ale karancinnyja mierapryjemstvy pakul nie dazvalajuć heta zrabić.
Alaksandr Łukašenka taksama padziakavaŭ śpiecpasłańniku Papy za pryjezd, nazvaŭšy jaho vizit u Minsk dobrym znakam.
«Jość ab čym pahavaryć, u nas zaŭsiody było šmat tem. Mnohija temy i zastajucca, ich adrazu nie vyrašyš. Ale niejkija zruchi jość», — zajaviŭ jon.
Kłaŭdya Hudžeroci taksama ličyć, što za čas jaho raboty ŭ Biełarusi, u bakoŭ atrymałasia mnohaje zrabić dla raźvićcia adnosin. «Na žal, vy rana źjechali ad nas. Paśla Vialikabrytanii vam treba znoŭ u Biełaruś viartacca», — adkazaŭ Łukašenka.
«Paśla Vialikabrytanii moža być piensija. Tam nie vidać sonca — niebiaśpiečna dla zdaroŭja», — taksama pažartavaŭ arcybiskup.
