Fota Nadziei Bužan
Muž Volhi Chižynkovaj Ivan Marozaŭ napisaŭ post u Instagram, u jakim padziakavaŭ nieabyjakavym biełarusam za padtrymku i paprasiŭ ich nie sustrakać Volhu, kali tuju adpuściać.
— Siabry, my, blizkija Voli, biaskonca ŭdziačnyja za tuju padtrymku, jakuju vy akazvajecie ŭsim nam užo druhi miesiac. Heta ščaście — viedać, što vakoł stolki dobrych, sumlennych i dobrych ludziej, hatovych padstavić plačo ŭ ciažkuju chvilinu.
Na žal, my ŭsio jašče nie viedajem dakładnaj daty vychadu Voli. Ale chacieli b zahadzia źviarnucca z prośbaj da ŭsich, chto nieabyjakavy da jaje situacyi. My vielmi chočam, kab sustreča Voli nie była masavym mierapryjemstvam. Tam buduć tolki samyja blizkija.
Heta važna jak dla vašaj biaśpieki (nichto nie viedaje, jak supracoŭniki Akreścina pastaviacca da zboru ludziej la ŭvachodu), tak i dla maralnaha kamfortu Volhi, jakaja znachodzicca ŭ turmie ŭžo bolš za miesiac.
Asobnaja prośba da žurnalistaŭ. My vielmi pavažajem vašu pracu. Kali łaska, nie prasicie kamientary i intervju. Volha dobry i adkryty čałaviek. Dajcie joj mahčymaść pryjści ŭ siabie i adnavicca. My vielmi spadziajemsia na vaša razumieńnie.
Viedajučy Volu, možna z upeŭnienaściu skazać, što paśla jana sama zachoča sustrecca z usimi, chto tak jaje padtrymlivaŭ. A jašče — usie vašy listy, padarunki i inšyja znaki ŭvahi abaviazkova dojduć da adrasata. Dziakuj vam vialiki, vydatnyja ludzi! — napisaŭ Ivan.
Mis Biełaruś — 2008, eks-pres-sakratar bresckaha «Dynama», dabračynca Volha Chižynkova była zatrymanaja 8 listapada ŭ centry Minska padčas adnaho z maršaŭ pratestu. Zatym jana była asudžanaja na 12 sutak za ŭdzieł u niesankcyjanavaj akcyi, zatym joj dali jašče dva razy pa 15 sutak za ŭdzieł u raniejšych akcyjach.
