BiełTA
Pra heta jon zajaviŭ siońnia na sustrečy z «palityčnym aktyvam» krainy, piša BiełTA.
Łukašenka adznačyŭ, što paetapny razbor padziej u krainie vyjaŭlaje sapraŭdnyja zadumy i taktyku źniešnich navat nie apanientaŭ Biełarusi, a ahresaraŭ. Jon skazaŭ, što na praciahu apošnich dziesiaci hadoŭ jany skrupulozna rychtavalisia da ciapierašniaha času «Č».
«Kab adrazu źniać usie maski, nazaviom hetych hulcoŭ pajmienna. Na ŭzroŭni hłabalnych centraŭ heta pierš za ŭsio Złučanyja Štaty Amieryki, bolš kankretna — ich sietka fondaŭ pa padtrymcy tak zvanaj demakratyi. Na jeŭrapiejskim kantyniencie aktyŭna dziejničali amierykanskija satelity: Polšča, Litva, Čechija i, na žal, naša Ukraina», — adznačyŭ Łukašenka.
Kožnaja z hetych krain adpracoŭvała svaju rolu, padkreśliŭ jon. Čechija — z daŭnich časoŭ u jakaści resursnaha chaba, Polšča — spačatku jak inkubatar miedyjakanałaŭ («Biełsat», «Niechta» i inšyja), a zatym — jak placoŭka dla alternatyŭnych orhanaŭ u vyhnańni.
«Litva, abražanaja temaj BiełAES, — jak taran biełaruska-jeŭrapiejskich stasunkaŭ. Ukraina, niahledziačy na našu niaźmiennuju jaje padtrymku (naprykład, u pytańniach terytaryjalnaj cełasnaści dy i pa inšych), nasupierak duchu našych uzajemaadnosin stała farpostam palityčnych pravakacyj, — dadaŭ Alaksandr Łukašenka. — Takim čynam, my vyrazna bačym subjektaŭ hetaha pracesu, ich pravadyroŭ i pamahatych. Taktyka arhanizataraŭ budavałasia pa kłasičnym amierykanskim padručniku kalarovych revalucyj. Heta ŭsim viadomy Džyn Šarp. Ciapier my možam azirnucca nazad i detalova razabrać usie etapy scenara pa źniščeńni našaj krainy, jakomu my, na ščaście, nie dazvolili realizavacca i nie dazvolim».
Jon taksama zajaviŭ pra siem scenaroŭ «źniščeńnia Biełarusi», pačynajučy ad pratestaŭ suprać dekreta ab darmajedach.
