Advakat Ludmiła Kazak 9 vieraśnia raspaviała niekatoryja padrabiaznaści sustrečy z Maryjaj Kaleśnikavaj.
Fota Nadziei Bužan
Maryja adčuvaje siabie dobra i badziora, niahledziačy na pieražyty stres za apošnija dvoje sutak. U kamiery ŭ jaje šeść susiedak. U SIZA Maryi akazvali dapamohu: u jaje padymaŭsia cisk i turbuje serca. Na ciele jość udary, pabolvajuć ruki, bo jaje siłaj zapichvali ŭ mašynu i ŭtrymlivali. Advakat maje namier źviartacca da śledčaha z zajavaj ab praviadzieńni sudova-miedycynskaj ekśpiertyzy.
Maryja Kaleśnikava rasceńvaje padziei apošnich dzion jak vykradańnie — surjoznaje kryminalnaje złačynstva — i razam z advakatam maje namier składać zvaroty z metaj ustanavić usich vinavatych u jaje vykradańni i hvałtoŭnym vyvazie na miažu. Usio, što raspaviała Maryja advakatu, paćviardžaje historyju Ivana Kraŭcova i Antona Radniankova, jakich prymušali vyvieźci Maryju va Ukrainu.
Maryja taksama sutyknułasia z pahrozami fizičnaj raspravy, jakija, znachodziačysia ŭ budynku HUBAZiK, usprymać akramia jak realnymi nie mahła. Pa faktach pahroz pazbaŭleńnia žyćcia Maryja taksama maje namier padavać zajavy.
«Zajaŭlałasia, što ŭ vypadku, kali ja dobraachvotna nie pakinu terytoryju Respubliki Biełaruś, mianie ŭsio roŭna vyviezuć: žyvoj ci pa častkach», — kazała Kaleśnikava advakatu.
«Mnie nadzieli na hałavu miašok, zapichali ŭ mikraaŭtobus i vyvieźli na biełaruska-ŭkrainskuju miažu (Alaksandraŭka), dzie z užyvańniem siły, suprać majoj voli sprabavali vypravadzić mianie z Respubliki Biełaruś».
«Paśla taho jak ja parvała svoj pašpart, vyklučyŭšy takim čynam ujezd na terytoryju Ukrainy, mianie znoŭ pasadzili ŭ mikraaŭtobus i dastavili ŭ Mazyrski pamiežny atrad, dzie ja znachodziłasia da viečara 8 vieraśnia».
