U apošnija dni vybarčaj kampanii ŭ Minsku i inšych haradach ludziej pačali zatrymlivać za rasklejku płakataŭ i ŭlotak ahitacyjnaha ci palityčnaha charaktaru, pieradaje PC «Viasna».
Tak, pozna ŭviečary ŭ Minsku byli zatrymany Siarhiej Ščycienka i Alaksiej Sančuk. Ich zatrymlivali try mašyny milicyi. Spačatku advieźli ŭ RUUS Savieckaha rajona, a zatym pakinuli na noč u izalatary da suda. Taksama paviedamlajecca, što mašynu adnaho z chłopcaŭ evakuiravali, bo ŭ joj znajšli ŭlotki na vybarčuju tematyku.
Evakuacyja mašyny
Taksama za raspaŭsiud ulotak unačy z čaćviortaha na piataha žniŭnia byli zatrymany Arciom Alšeŭski i Dźmitryj Žamojdzik. Ich źmiaścili ŭ izalatar časovaha ŭtrymańnia na vulicy Akreścina da suda.
Suda za rasklejku ŭlotak (vierahodna, ad inicyjatyvy «Sumlennyja ludzi») čakaje Viktoryja Kaniušenka. Jana była zatrymana ŭviečary paniadziełka i bolš za sutki praviała ŭ izalatary.
Zatrymanaha viečaram u niadzielu za rasklejku płakataŭ Andreja Klincova asudzili na 15 sutak pa art. 17.1 KaAP (Drobnaje chulihanstva). Rašeńnie vynies sud Pieršamajskaha rajona.
U subotu za rasklejku ścikieraŭ z vyjavaj milicyjantaŭ byŭ zatrymany Leanid Skuratovič, a ŭ paniadziełak zatrymali ravarysta Siarhieja Bialeviča za toje, što kleiŭ ahitacyjny płakat na stend «Vybary» kala administracyi Pieršamajskaha rajona.
Čaćviortaha žniŭnia ŭ Pareččy (Haradzienski rajon) zatrymali dvuch 19-hadovych chłopcaŭ, Paŭła Čylika i Jana Hałuboviča, za rasklejku ŭlotak. Na ich skłali pratakoły pa art. 9.11 KaAP, zabrali mabilnyja telefony i vyzvalili.
