Bankam — jak dziaržaŭnym, tak i pryvatnym — rekamiendavali admovicca ad raźmiaščeńnia rekłamy ŭ niedziaržaŭnych ŚMI. Heta było ahučana na adnym z apošnich pasiadžeńniaŭ Nacbanka, na jakim prysutničali kiraŭniki bankaŭ. Pra heta Tut.by raspaviali niekalki krynic.
Na jaki termin raspaŭsiudžvajecca rekamiendacyja, nie paviedamlajecca. U Nacbanku nie paćvierdzili, što vystupali z padobnaj inicyjatyvaj, i nie stali kamientavać, čyja heta rekamiendacyja — rehulatara ci niejkaha inšaha dziaržorhana, jaki paprasiŭ jaje danieści. Adzin z udzielnikaŭ rekłamnaha rynku raspavioŭ, što padobnyja rekamiendacyi jurydyčna nieabaviazkova vykonvać, ale pry hetym «usie razumiejuć, što pry nievykanańni mahčymyja inšyja miery ŭździejańnia». Pra toje, što ŭłady majuć namier zaniacca raźmierkavańniem rekłamnych dachodaŭ u internecie, havaryŭ u pieršaj pałovie lipienia na sustrečy Łukašenki z pradstaŭnikami dziaržSMI ministr infarmacyi Ihar Łucki.
Ilustracyjny zdymak. Fota: Siarhiej Bałaj, Tut.by
Infarmacyju adnosna rekamiendacyi pa rekłamie ŭ niedziaržaŭnych ŚMI ŭ pres-słužbie rehulatara nie stali ni paćviardžać, ni kamientavać. Pry hetym udakładnili, što na sustrečy ŭ Nacbanku pradstaŭniki inšych dziaržorhanaŭ abo arhanizacyj nie prysutničali.
