Papularny viadoŭca Andrej Bond praviadzie 5 lipienia «vodny strym» z pałuby prahułačnaha ciepłachoda. U ramkach muzyčnaha festyvalu VELO_ve Music Fest 2.0 artysty daduć anłajn-kancert naŭprost ź Mienskaha mora, piša «Radyjo Svaboda».
Svaje najlepšyja treki ŭ naŭprostavym efiry pakažuć siamiejny duet muzykaŭ p.e.t.s. aka Maximalism, a taksama Lucarelli i Mihas. Virtualnuju suviaź z publikaj budzie padtrymivać šoŭmen Andrej Bond. Raniej jon vostra vykazaŭsia adnosna taho, što adbyvajecca ŭ Biełarusi.
«Ciapier horš za ŭsio zastavacca abyjakavym, — napisaŭ Bond. — Nielha maŭčać i być u baku, byccam vas heta nie datyčycca. Vykazvajcie svaju pazycyju, abmiarkoŭvajcie, dziejničajcie, reahujcie. Havorka pra našu budučyniu, budučyniu našych dziaciej. Ja nie chaču žyć u napružańni i strachu. Ja chaču tolki spakoju, raźvićcia, sumleńnaści, svabody i pavahi da siabie, jak da hramadzianina. Nia bojsia, nie maŭčy. My nie narodziec, my narod. Adzin dubčyk možna złamać, a ceły vienik — nie».
Festyval VELO_ve Music Fest 2.0 prachodzić u niestandartnych lakacyjach jak u Biełarusi, tak i za miažoj. Papiaredniaja tranślacyja z papularnymi biełaruskimi hurtami Intelligency i «Sajuz» była ź histaryčnaha kutku Smalany na Aršanščynie. Raniej z vyspy Ibica ŭ Mižziemnym mory vyjšaŭ na suviaź valensijec James Jach. A pieršaje ŭklučeńnie adbyłosia z udziełam eksperymentalnaha fryk-teatru T(e):Art.
Ciapierašnija ŭdzielniki p.e.t.s. aka Maximalism — elektronny duet ź Miensku. Heta tvorčy sajuz maładych muzykaŭ Maksima i Alesi, treki jakich užo remiksavali viadomyja va ŭsim śviecie pradusary Lake Avalon, Rafael Cerato, Kiki dy inšyja.
Tranślacyi festyvalu dastupnyja dla biaspłatnaha prahladu.
Strym 5 lipienia projdzie z 20-j hadziny da apoŭnačy.
