Alaksandr Łukašenka siońnia na naradzie paŭtaryŭ raniejšyja parady suprać COVID-19 — karanavirus nibyta možna «trucić» harełkaj i łaźniaj.«Ja niekali abmoviŭsia ab tym, što ludziam treba, kab zmahacca z roznymi virusami, u tym liku i z hetym, čaściej chadzić u suchuju łaźniu, — zajaviŭ Alaksandar Łukašenka. — Pakolki COVID-19 nie lubić vysokich temperaturaŭ i pry plus šaścidziesiaci, jak mianie prainfarmavali śpiecyjalisty, hinie».
Doktar-reanimatołah Źmicier Sałoškin rastłumačyŭ Svabodzie, čamu navat samaja haračaja saŭna nie lekuje ad COVID-19:
«Kali vy siedzicie ŭ saŭnie, a čałaviek kudyści pierad vami kašlanuŭ na palicu, tady tak, kali tam suchoje pavietra 100 hradusaŭ, virus zahinie dosyć chutka, — kaža jon. — Ale tempieratura cieła čałavieka ŭsiaredzinie heta adna z samych žorstkich kanstantaŭ. I navat kali samaja mocnaja chvaroba, heta 40 hradusaŭ.
Navat kali vy siedzicie ŭ saŭnie, temperatura cieła zastajecca stabilnaj. Tak što čałaviek-nośbit hetaha virusu, kali pasiadzieŭ u saŭnie, vyjdzie i znoŭ budzie kašlać i raspaŭsiudžvać virus.
Saŭna za košt tempieratury moža chiba što «aŭtamatyčna» pravodzić dezynfekcyju, ale ŭ ciele čałavieka nielha dasiahnuć takoj tempieratury».
Lekar dadaje: i inšyja «narodnyja srodki», jak časnyk i cybula, nie ličacca dziejnymi, a sapraŭdnyja rekamiendacyi suprać COVID-19 dastupnyja i davoli prostyja.
Nasamreč, u Suśvietnaj arhanizacyi zdaroŭja niama daśledavańniaŭ, jakija b pakazvali, što virus SARS-CoV-2 hinie pry tempieratury ŭ 60 hradusaŭ.
