Žančyna za kadram tłumačyć, što došku zahadała źniać dyrektarka škoły. Za toje, što baćki admovilisia źbirać hrošy na novuju došku.
«Naša Niva» datelefanavałasia da dyrektara škoły № 25 Niny Klazovič, kab taja rastłumačyła, što ž adbyłosia ŭ škole.
«Mnie dzika, što hety vypadak atrymaŭ taki rezanans. Situacyja była nastupnaja. Ja ŭčora zajšła ŭ kabiniet, dzie zajmajucca pieršakłaśniki. Ubačyła, što adzin ćvik ad doški ledźvie trymajecca, tyrčyć. Padumała, što heta niebiaśpiečna, zahadała došku źniać, ćviki prybić. Došku źniali ŭčora, siońnia z ranicy pryjšła mama adnaho z vučniaŭ, ubačyła, što doški niama i zapisała heta videa. Videa zapisvałasia ŭ 7:40, u 9:30 doška visieła na miescy», — zapeŭnivaje Nina Klazovič.
Bolš za ŭsich, raskazvaje dyrektarka, u hetaj situacyi razhubiłasia nastaŭnica pačatkovych kłasaŭ.
«Jana sioleta tolki skončyła piedahahičny kaledž, na videa vidać, što jana až razhubiłasia, nie viedała, što adkazać toj mamie. Ja dyrektar užo 18 hadoŭ, ale taki vypadak u mianie ŭpieršyniu. Nu čamu nielha było padyści da mianie?» — pytajecca dyrektarka.
Nina Klazovič raskazvaje, što da siońniašniaha «kipiešu» ŭ kłasie nie ŭzdymałasia pytańnie nakont doški.
«Doška visieła karyčnievaja, u draŭlanaj akantoŭcy. Na joj dobra ŭsio było bačna, dobra pisałasia. Nu raz chočuć baćki novuju, pojdziem nasustrač. Zamovim zialonuju, u akantoŭcy z «nieržaviejki»,— tłumačyć Nina Klazovič.
Dyrektarka ŭdakładniaje, što novaja doška źjavicca ŭ pieršakłaśnikaŭ 19 śniežnia. Jaje zamoviać na pazabiudžetnyja srodki.
