Vyšejšy sud Ispanii pačaŭ rasśledavańnie ab dziejańniach supracoŭnikaŭ padraździaleńnia Hałoŭnaha ŭpraŭleńnia Hienštaba US Rasii (bolš viadomaha jak HRU) va ŭnutranyja spravy Katałonii. Pra heta paviedamlaje El Pais.
Pa źviestkach haziety, u śpiecsłužbaŭ jość praŭdapadobnyja dokazy ab padtrymcy Maskvoj katałonskaha sieparatyzmu. Havorka idzie pra vajskovuju častku №29155, jakuju amierykanskija ŚMI nazyvajuć elitnym padraździaleńniem, stvoranym dla «praviadzieńnia skaardynavanaj kampanii pa destabilizacyi Jeŭropy».
Ispanskaje vydańnie taksama zhadvaje pra mahčymyja padarožžy ŭ Barsiełonu napiaredadni refierendumu ab niezaležnaści treciaha «atrutnika» byłoha pałkoŭnika HRU Siarhieja Skrypala i jaho dački Julii Dzianisa Siarhiejeva. Inšy epizod u spravie źmiaščaje infarmacyju, što emisaru byłoha kiraŭnika ŭrada Katałonii Karlesu Pučdemonu nibyta abiacali publičnuju dekłaracyju ŭ padtrymku niezaležnaści adzinaha prezidenta SSSR Michaiła Harbačova.