Ministr unutranych spraŭ Juryj Karajeŭ u efiry BT-1 raspavioŭ, čamu admianiŭ pahałoŭnyja pravierki supracoŭnikaŭ na palihrafie.
«Nie zusim daskanałaja hetaja sistema, kali tolki palihrafičnaje psichafizijałahičnaje daśledavańnie zakryvaje čałavieku darohu dla praciahu słužby. Sapraŭdy, ja admianiŭ pahałoŭnaje, tatalnaje prachodžańnie ŭsimi supracoŭnikami palihrafa, tamu što čałaviek moža i chvalavacca, i nie vytrymlivać doŭha zamknionaj prastory», — skazaŭ Juryj Karajeŭ.
Na jaho dumku, charaktarystyka na supracoŭnika z boku načalnika i kalektyvu važniejšaja, čym vyvad palihrafista, jaki ŭžo zahadzia, z praduziataściu sprabuje jaho ŭ čymści vykryć. Da taho ž daśledavańnie nie zusim dakładnaje, jość pracent chibnaści.
«Ja pryniaŭ takoje rašeńnie, choć śviadoma razumieju, što niečym pahrašu suprać ułasnaj biaśpieki ŭ našych radach, dzieści moža i projduć takija, kaho i varta było prypynić na słužbie», — adznačyŭ ministr. Jon dadaŭ, što palihraf dapamahaje niešta vyśvietlić, ale nie źjaŭlajecca panacejaj.
