Polšča: z 2012-ha kolkaść biełarusaŭ nie pierastaje raści
Na zimovy siemiestr 18/19 navučalnaha hoda (heta pamiž 1 vieraśnia i 30 listapada 2018-ha) u polskija ŭniviersitety pastupiła 3686 pieršakurśnikaŭ ź Biełarusi, — adkazali ŭ Ministerstvie adukacyi i navuki Polščy.
Na letni siemiestr taho ž navučalnaha hoda ŭ Polščy ŭsiaho naličvałasia 6080 biełaruskich studentaŭ (sa statusam pa stanie na 1 žniŭnia 2019 hoda).
Kali paraŭnoŭvać pa hadach, to ahulnaja kolkaść biełaruskich studentaŭ u Polščy nie pierastavała raści z 2012-ha hoda: 2344 čałaviek (u 2012 hodzie), 3220 (u 2013 hodzie), 3955 (u 2014 hodzie), 4555 (u 2015 hodzie), 5023 (u 2016 hodzie), 5980 (u 2017 hodzie), 7485 (u 2018 hodzie). Usie źviestki padličvalisia ŭ zimovych siemiestrach nazvanych hadoŭ.
Pa źviestkach adukacyjnaha fondu «Pierśpiektyvy», studenty ź Biełarusi tradycyjna zajmajuć druhoje miesca siarod studentaŭ ź inšych krain u Polščy. Adnak rost kolkaści biełaruskich studentaŭ nie paśpiavaje za rostam kolkaści zamiežnych studentaŭ u Polščy naohuł. Naprykład, u 2009-m hodzie biełarusy składali 13,7% siarod inšych zamiežnikaŭ, a ŭ 2018-m — užo tolki 9,3%.
Rasija: bolš studentaŭ, čym u Polščy, ale kolkaść nie raście
U 2018/19 navučalnym hodzie ŭ rasijskija VNU zaličyli 4328 studentaŭ ź Biełarusi — heta i biudžetniki, i płatniki. U adroźnieńnie ad Polščy, heta kolkaść zachoŭvajecca na adnym i tym ža ŭzroŭni ŭ apošnija hady: u 2017/18 navučalnym hodzie ź Biełarusi pryjechała 3581 čałaviek, u 2016/17 — 3891, u 2015/16 — 4863, u 2014/15 — 3594, u 2013/14 — 4296. Suadnosiny biudžetnikaŭ da płatnikaŭ kožny hod — prykładna 1 da 3.
Takija ličby padała Ministerstva adukacyi i navuki Rasijskaj Fiederacyi.
Heta šmat ci mała?
Kali skłaści ŭsich biełaruskich studentaŭ u Polščy (7,5 tysiačy) i ŭ Rasii (13 tysiač), to atrymlivajecca, što siońnia ź Biełarusi źjechała atrymlivać vyšejšuju adukacyju tolki ŭ hetyja dźvie krainy bolš za 20 tysiač studentaŭ. Usiaho ŭ našaj krainie ŭ 2018/2019 navučalnym hodzie vučylisia 252,6 tysiačy studentaŭ. Heta značyć, što za miažoj atrymlivajuć adukacyju jak minimum amal 8% ad kolkaści ŭsich studentaŭ, jakija vučacca ŭ Biełarusi.
Nahadajem, usiaho ŭ 2019-m navučalnym hodzie VNU Biełarusi płanavali pryniać 54,7 tys. pieršakurśnikaŭ — na 1% bolš u paraŭnańni z 2018-m. Pry hetym u cełym kolkaść studentaŭ za apošnija 10 hadoŭ źniziłasia: u 2010/2011 navučalnym hodzie va ŭniviersitetach krainy vučyłasia 442,9 tysiač studentaŭ, u 2015/2016 — 336,4 tysiačy, u 2018/2019-m — užo 268,1 tysiačy.
U BDU ŭ 2019-m hodzie pastupili 2130 abituryjentaŭ (u 2018-m — 2122), usiaho na dadzieny momant vučycca 28,5 tysiačy studentaŭ, mahistrantaŭ, aśpirantaŭ i daktarantaŭ, u BDUIR — bolš za 16 tysiač studentaŭ. Heta značyć pry žadańni z usich biełaruskich studentaŭ, jakija źjechali za miažu, možna «sabrać» jašče adzin univiersitet. A ź pieršakurśnikaŭ, jakija źjechali — try nabory BDU.
