Ukrainski režysior Aleh Siancoŭ, asudžany ŭ Rasii nibyta za teraryzm, pieraviedzieny z kałonii ŭ horadzie Łabytnanhi ŭ adzin z maskoŭskich SIZA. Pra heta paviedamili «Interfaks» i TASS sa spasyłkaj na krynicy.
Pa słovach surazmoŭcaŭ ahienctvaŭ, Siancoŭ dastaŭleny ŭ Maskvu ŭ ramkach abmienu źniavolenymi z Ukrainaj.
Krynica «Interfaksa» zajaviła, što režysior znachodzicca ŭ Butyrskaj turmie. Baza piša, što jaho ŭtrymlivajuć u SIZA «Lefortava».
Advakat Siancova Dźmitryj Dynzie nie paćvierdziŭ i nie abvierh infarmacyju ab pieravodzie svajho padabaronnaha ŭ Maskvu, piša TASS.
Učora ŭ Kijevie vyzvalili pad asabistaje paručalnictva kiraŭnika «RIA «Naviny» — Ukraina» Kiryła Vyšynskaha. Pad vartaj jon znachodziŭsia 400 dzion. Žurnalist byŭ aryštavany ŭ mai 2018 hoda pa abvinavačvańni ŭ dziaržzdradzie i padtrymcy «DNR» i «ŁNR». Kazałasia, što mienavita jon budzie abmienieny na Siancova.
***
Žychar Kryma, režysior Aleh Siancoŭ byŭ aryštavany viasnoj 2014 hoda i prysudžany ŭ Rasii da 20 hadoŭ źniavoleńnia za supraciŭleńnie anieksii vostrava — pavodle abvinavačvańnia, nibyta za arhanizacyju dyviersijnaj hrupy «Pravaha siektara». Jon nie pryznaŭ siabie vinavatym, zajaviŭ pra katavańni.
Letam 2018 hoda Siancoŭ abvieściŭ haładoŭku, patrabujučy vyzvaleńnia ŭsich ukrainskich palitviaźnieŭ, asudžanych u Rasii. Jana praciahvałasia 145 dzion, adnak treba ŭličvać, što Siancoŭ prymaŭ śpiecyjalnuju miedycynskuju sumieś.
