Viadomy viciebski pravaabaronca, pradstaŭnik Biełaruskaha Chielsinskaha kamiteta Pavieł Levinaŭ na minułym tydni mieŭ sustreču z staršynioj CVK Lidzijaj Jarmošynaj.
Levinaŭ, jak pryznajecca, išoŭ na sustreču z žadańniem prosta pry Jarmošynaj padpisać pietycyju ab jaje adstaŭcy, adnak pa vynikach sustrečy pieradumaŭ. Čym ža staršynia CVK tak ačaravała jaho?
Lidzija Jarmošyna i Pavieł Levinaŭ. Fota z facebook.com.
«Mnie jaje škada. Jana trapiła ŭ biazvychadnaje stanovišča, jana nie moža ź jaho vyjści. Ja joj zusim nie zajzdrošču. Joj i zastavacca ciažka, i syści jana nie moža», — skazaŭ Pavieł Levinaŭ.
«Davajcie ŭjavim sabie situacyju, što zaŭtra staršynioj CVK pryznačać Śviatłanu Kalinkinu. Skažycie, kali łaska, što źmienicca na vybarach u parłamient? Datu vybaraŭ Kalinkina zmoža pamianiać?
Nu, pamianiajuć staršyniu kamisii, stanie im Pavieł Levinaŭ, Śvieta Kalinkina, Tola Labiedźka. Ja kažu, što treba [naziralnikam — «NN»] nie filejnyja častki pakazvać, a biuleteni, a kamisija kaža, što nie. Zamiena Jarmošynaj ničoha nie daje.
Labiedźka pačynaje kampaniju za adstaŭku Jarmošynaj: Skiń jarmo! VIDEA
Łukašenka pryznačyŭ ministra adukacyi biez uzhadnieńnia z premjer-ministram. Čamu siabraŭ CVK buduć pryznačać inšych? Usie rašeńni ŭ našaj krainie, až da taho, kali siejać i kali arać, prymaje adzin čałaviek. I my ŭsie hetaha čałavieka viedajem.
Ja Lidzii Michajłaŭnie pryvioŭ fakty parušeńniaŭ, jakija ja asabista vyjaviŭ. Kali ciapier usie rychtujucca da novych vybaraŭ, to ŭ mianie jašče iduć spravy pa minułych, jašče Śledčy kamitet rasśleduje spravy. I jak jany hałasy ličać, i jak falsifikujuć. Ci vy dumajecie, što ja tam ź joj čaj piŭ?
Jaje adstavili, kaho zaŭtra pryznačać staršynioj CVK? Mianie chiba pryznačać? Nie. Pryznačać takuju samuju, jak Jarmošyna. Nijakaj roźnicy niama, pakul my nie źmienim sistemu. Jana vykonvaje zahady nie tamu, što JAR-MO-ŠY-NA, a tamu, što vykonvaje zahady prezidenta.
A kali Levinaŭ, Kalinkina ci Labiedźka skažuć niešta suprać na pasadzie staršyni CVK, to nazaŭtra ŭžo pryznačać inšaha čałavieka. I dobra, kali pryznačać, a nie zrobiać tak, jak z Hančarom.
Vinavataja nie Jarmošyna i navat nie Łukašenka, vinavaty my z vami, što dazvalajem kraści hałasy. A jakoje proźvišča ŭ staršyni CVK roźnicy niama.
Ja jak pravaabaronca mahu nazvać čałavieka złačyncam tolki paśla vyraku suda. U nas nichto nie admianiaŭ prezumpcyju nievinavataści. Ci Jarmošyna złačynca? Ja nie mahu publična adkazać na heta pytańnie, choć unutry ŭ mianie jość adkaz.
U vas kraduć hałasy, čamu vy nie źviartajeciesia nakont hetaha ŭ Hienieralnuju prakuraturu, Śledčy kamitet? Tak što ŭsie vinavatyja ŭ falsifakacyi vybaraŭ», — ličyć viciebski pravaabaronca.
***
Pavieł Levinaŭ u minułym vajskoviec. Byŭ zvolnieny z Uzbrojenych siłaŭ za pazoŭ suprać ministra abarony ŭ 2001 hodzie. U BCHK ad 2000 hoda. Nieadnarazova zatrymlivaŭsia siłavikami, siadzieŭ na sutkach i atrymlivaŭ štrafy.
Čytajcie. Viciebski pravaabaronca Levinaŭ paskardziŭsia ŭ prakuraturu na dyskryminacyju ruskaj movy
