Fota Nadziei Bužan
26 žniŭnia dniom u apieratyŭna-dziažurnuju słužbu Chojnickaha RAUS źviarnuŭsia miascovy žychar. Jon raspavioŭ, što jaho 53-hadovy brat 23 žniŭnia pajšoŭ u hryby i prapaŭ. Mabilnika pry im nie było, paviedamlaje Homielskaja abłasnaja milicyja.
Milicyjanty vyśvietlili, što źnikły adpraviŭsia ŭ hryby razam z pryjacielem. Pryčym pryjaciel, zaŭziaty hrybnik, daŭno abiacaŭ siabru ŭziać jaho z saboj.
23 žniŭnia jany pajšli ŭ lasny huščar niedaloka ad v. Niabytaŭ. U vyniku razyšlisia. I kali vopytny hrybnik viarnuŭsia dadomu, to navičok nie zdoleŭ.
Apieratyŭniki znajšli pryjaciela. Mužčyna pakazaŭ prykładnaje miesca, dzie razyšlisia. Pačaŭsia pošuk.
Bližej da viečara, za 4 kiłamietry ad vioski, jany ŭbačyli źnikłaha hrybnika. Mužčyna siadzieŭ na ziamli. Jon byŭ u prytomnaści, moh pierasoŭvacca samastojna, ale byŭ mocna abiazvodžany. Milicyjanty napaili jaho. Na pytańnie, čym jon charčavaŭsia ŭvieś čas, adkazaŭ, što jeŭ čarnicy. Spaŭ prosta na ziamli, taksama na im była ciopłaja vopratka.
Mužčynu dapamahli dabracca da milicejskaj mašyny i dastavili dadomu. Ad miedycynskaj dapamohi jon admoviŭsia.
