Naviny Maskvy i MV / Vk.com
41 čałaviek, u tym liku adzin člen ekipaža, zahinuŭ u avijakatastrofie Superjet u maskoŭskim aeraporcie «Šaramiećcieva», paviedamiła pradstaŭnik Maskoŭskaha mižrehijanalnaha ŭpraŭleńnia śledčaha kamiteta na transparcie Alena Markoŭskaja, piša Interfaks.
Raniej paviedamlałasia ab 13 achviarach avijakatastrofy i ab jašče niekalkich špitalizavanych.
U niadzielu ŭviečary Superjet-100 kampanii «Aerafłot», što lacieŭ z Maskvy ŭ Murmansk, viarnuŭsia ŭ aeraport vyletu «Šaramiećcieva», ździejśniŭ avaryjnuju pasadku i zahareŭsia. Šmat kamu ŭdałosia evakujavacca pa avaryjnym trapie.
Da ciapierašniaha času avaryjna-vyratavalnyja raboty na miescy katastrofy ŭ «Šaramiećcieva» zavieršany.
Krynica, znajomaja ź situacyjaj, raniej paviedamiła «Interfaksu», što Superjet nieŭzabavie straciŭ suviaź z dyśpietčarami. «Z-za papadańnia małanki, pa papiarednich dadzienych, była stračanaja suviaź z dyśpietčaram. Zatym admoviła ŭsia aŭtamatyka. Ekipaž nie staŭ vypracoŭvać paliva. Samalot pajšoŭ na pasadku ź pieravyšeńniem pasadačnaj masy i vialikim pieralotam paradku 1400 mietraŭ. U vyniku pasadka adbyłasia na siaredzinu pałasy, stojki šasi razburyłasia. Jaje elemienty, mahčyma, patrapili ŭ ruchavik, jaki zahareŭsia», — raspaviała krynica.
Infarmavanaja krynica paviedamiła «Interfaksu», što asnoŭnaj pryčynaj hibieli ludziej u chvastavym adsieku Superjet-100 stała sproba niekatorych pasažyraŭ dastać z bahažnych palic svaje rečy.
«Pa papiarednich dadzienych, z apytańnia vidavočcaŭ vynikaje, što kali samalot stuknuŭsia ab ziamlu, [padskočyŭ, iznoŭ stuknuŭsia] i zahareŭsia, niekatoryja pasažyry stali ŭ panicy dastavać svaje rečy z palic. Heta abciažaryła evakuacyju ludziej z zadnich šerahaŭ sudna, i jany zahinuli ŭ ahni», — skazaŭ surazmoŭca ahienctva.
Jon nahadaŭ, što pierad vyletam ekipaž luboha samalota zaŭsiody instruktuje na hety kont pasažyraŭ. «Adnak, u ekstremalnaj situacyi ludzi dziejničajuć mašynalna, sprabujuć vyratavać asabistyja rečy, nie dumajučy, što heta śmiarotna niebiaśpiečna i dla ich i dla inšych», — skazała krynica.
U toj ža čas ekśpierty staviać pad sumnieŭ viersiju papadańnia ŭ samalot małanki jak pačatku prablem. Sučasnyja samaloty abaronienyja ad małanak, i katastrof z takoj pryčyny daŭno nie było. U toj ža čas rasijski Superjet-100 maje reputacyju vielmi prablemnaj mašyny.
