Metaj I Biełaruskaha investycyjnaha forumu ŭ Londanie było znajomstva pradstaŭnikoŭ suśvietnaha biznesu ź investycyjnymi mahčymaściami Biełarusi, a našych uradoŭcaŭ — z suśvietnym biznesam. Na dumku premjer‑ministra Siarhieja Sidorskaha, «forum pierasiahnuŭ usie našy čakańni».
16 listapada ŭ londanskim aeraporcie «Hetvik» vysadziŭsia ŭnušalny desant biełaruskich udzielnikaŭ pieršaha Biełaruskaha investycyjnaha forumu — u 4‑zorkavym hateli «Park Plaza County Hall» dla biełarusaŭ zabraniravali 180 miescaŭ.
Ź biełaruskaha boku pracu forumu ŭznačaliŭ premjer‑ministar Siarhiej Sidorski. Udzieł u forumie ŭziali ministry ekanomiki i sielskaj haspadarki, namieśniki ministraŭ pramysłovaści i enerhietyki, kiraŭniki halinovych kancernaŭ, bankaŭ, zavodaŭ. Źviarnuła ŭvahu, što ŭ składzie delehacyi byŭ i dyrektar Haradzienskaha harbarnaha zavodu, były kandydat u prezydenty ad apazycyi, Siamion Domaš.
Zamiežnych ekspertaŭ dy investaraŭ pradstaŭlali łord Robert Skidelski, jaki akramia ŭsiaho ŭvachodzić u radu dyrektaraŭ rasiejskaj karparacyi «Systema», Supačaj Paničpakdzi, hiensakratar Kanferencyi AAN pa handli i raźvićciu, Alachandra Chara, namieśnik hiendyrektara SHA, a taksama pradstaŭniki zamiežnych bankaŭ i kampanijaŭ, što majuć svoj biznes u Biełarusi.
***
Ułasna forum byŭ padzieleny na šerah tematyčnych sekcyjaŭ: «Pramysłovaść, naftachimičny kompleks i enerhietyka», «Raźvićcio finansavych rynkaŭ i finansavych instytutaŭ», «Ahrapramysłovy kompleks, charčovaja i lohkaja pramysłovaść», «Rehijony, svabodnyja ekanamičnyja zony, mały i siaredni biznes». Darečy, siarod vystupoŭcaŭ na apošniaj sekcyi pradstaŭnikoŭ niezaležnych pradprymalnickich arhanizacyjaŭ zaŭvažana nie było.
Biełarusy pradstavili ŭvazie zamiežnych investaraŭ bolš za 70 investprajektaŭ, siarod jakich — stvareńnie marskoha handlovaha flotu Biełarusi, pabudova zavodu pa vytvorčaści aŭtobusaŭ na bazie MAZu, stvareńnie kaskadaŭ HES na Dźvinie i Dniapry dy inš.
Na vynikovaj pres‑kanferencyi premjer‑ministar Siarhiej Sidorski zajaviŭ, što «forum u Londanie pierasiahnuŭ usie našy čakańni».Čym nasamreč mohuć pachvalicca arhanizatary forumu? Adnym z samych perspektyŭnych vynikaŭ forumu možna nazvać pratakoł ab namierach pamiž biełaruskim Minekanomiki i polskaj kampanijaj «Kulčyk Chołdynh» nakont pabudovy vuhalnaj elektrastancyi ŭ Biełarusi. Prajekt aceńvajecca pryblizna ŭ $1 młrd. Havorki pra jaho viaducca hady čatyry, dy pakul biaz vyniku. Mierkavałasia, što heta budzie stancyja na polskim vuhali. Tolki ž vytvorčaść jaho ŭ Polščy skaračałasia, kraina sama maje pieratvarycca ŭ imparciora hetaha paliva.
Siarod inšaha, S.Sidorski mieŭ pieramovy ź kiraŭnictvam amerykanskaj karparacyi «Katerpiłar». Havorka viałasia pra mahčymaści supolnaj vytvorčaści ruchavikoŭ.
Pavodle słovaŭ vice‑premjera Andreja Kabiakova, zasłuha nia raz krytykavanaha dziaržaŭnaha kantrolu nad ekanomikaj u tym, što suśvietny kryzis pakul mała kranuŭ Biełaruś.
Vice‑prezydent banku RBS (ABN Amro) Frank Kajłaarz nazvaŭ umovy pracy ŭ Biełarusi zručnymi, bo tut «pracujuć vysokakvalifikavanyja i zyčlivyja ludzi» dy dziejničaje «dakładna adładžanaja arhanizacyja praviadzieńnia ŭhodaŭ». Bank ABN Amro viadomy najpierš pa dvum bujnym pracesam — atrymańni Biełaruśsiu krainavaha kredytnaha rejtynhu i pieradpradažnaj acenkaj «Biełtranshazu».
Nichto ź niezaležnych žurnalistaŭ ź Biełarusi na forum nia jeździŭ. Hrošy, viadoma, lubiać cišu, ale heta, badaj, nia toj vypadak.
Prysutnaść karespandentaŭ nie zaškodziła b.
«Jak PR‑akcyja, forum mahčyma, byŭ paśpiachovy» — miarkuje namieśnica redaktara ekanamičnaha tydniovika «Biełorusy i rynok» Iryna Kryłovič. Što da doŭhaterminovych jaho vynikaŭ, to kazać niešta pakul rana, miarkuje jana.
Analityk Instytutu pryvatyzacyi i menedžmentu Dźmitryj Kruk ličyć, što ŭ lubym vypadku Londanski forum naŭrad ci budzie mieć imhnienny vynik dla Biełarusi.
Varta adznačyć, što forum prypaŭ na niaŭdały čas: finansavy kryzis nie ŭtajmavany, dla Biełarusi horšyja časy, mahčyma, jašče napieradzie. Tamu sam momant dla pryvatyzacyi nie najlepšy — cana pradpryjemstvaŭ padaje, popyt nizki, svabodnych hrošaj na rynku mała.
