U parłamient zakonaprajekt ab źmienach narkatyčnych artykułaŭ KK pakul nie trapiŭ. Deputaty miarkujuć, zdarycca heta moža z dnia na dzień, paviedamlaje Tut.by.
— Zakonaprajekt u parłamient pakul nie pastupiŭ, choć płanavałasia heta jašče ŭ sakaviku, — kaža Natalla Hujvik, staršynia Pastajannaj kamisii Pałaty pradstaŭnikoŭ pa zakanadaŭstvie. — Dzie jon ciapier, ja nie viedaju. Mahčyma, u Administracyi prezidenta, mahčyma, u Nacyjanalnym centry zakanadaŭstva pravavych daśledavańniaŭ, śpiecyjalisty jakoha jaho raspracoŭvali.
Pa słovach Natalli Hujvik, zajmacca dakumientam budzie kamisija pa nacyjanalnaj biaśpiecy.
— My dva hady pracavali nad hetym zakonaprajektam, — praciahvaje surazmoŭca. — Našy prapanovy uličanyja. Siarod ich — źnizić nižniuju sankcyju pa č. 2 i pa č. 3 artykuła 328 KK — da 3 i 6 hadoŭ adpaviedna.
Zaraz č.2 artykuła 328 KK praduhledžvaje ad piaci da vaśmi hadoŭ pazbaŭleńnia voli, č.3 — ad vaśmi da piatnaccaci. Suprać prapanoŭ, kaža surazmoŭca, na pracoŭnaj hrupie vystupali MUS i Viarchoŭny sud.
— My pryjšli da vysnovy: zakon surovy, ale pravilny, — adznačaje surazmoŭca. — Adnak pravaprymianialnaja praktyka pajšła krychu nie pa tym šlachu. Heta značyć, pad zbyt trapili i spažyŭcy. A hałoŭnaje — adnarazovyja spažyŭcy, u tym liku niepaŭnaletnija. My pahladzieli, što z 2014 pa 2016 hady kolkaść asudžanych pa 328 artykule pavialičyłasia amal u dva razy.
U 2014-m, kali artykuł zrabili bolš žorstkim, ličyć surazmoŭnica, heta była nieabchodnaja miera. Tady jakraz byŭ usplosk spajsaŭ, nasvaju.
— Ale, na žal, praktyka pakazała, što ŭ miescy pazbaŭleńnia voli stali traplać maładyja ludzi 15-25 hadoŭ, — kaža Natalla Hujvik. — Za košt hetych rabiat, jakija sumiesna ŭžyvali, i adbyŭsia rost asudžanych. Pryčym na termin ad 8 hadoŭ. Paśla hetaha my stali prapanoŭvać unieści źmieny ŭ 328 artykuł.
Kali mienavita prajekt zakona patrapić u parłamient, surazmoŭnica nie viedaje.
— Čakajem, ja dumaju, z dnia na dzień, — adznačaje Natalla Hujvik.
— Pakul u parłamiencie zakonaprajekta niama, — adznačaje Valancin Michnievič, staršynia pastajannaj kamisii Pałaty pradstaŭnikoŭ pa nacyjanalnaj biaśpiecy. — Kali jon pastupić, my nie viedajem.
