U chodzie vystavy «ŚMI ŭ Biełarusi 2018» karespandent «Našaj Nivy» pahavaryŭ z kiraŭnikom Biełteleradyjokampanii Ivanam Ejsmantam.
Ivan Ejsmant. Fota Siarhieja Hudzilina.
Najpierš, my pacikavilisia, čaho brakuje biełaruskim kanałam.
«Jak pavysić jakaść kantentu tak, kab my mahli nie tolki ŭ vialikaj stupieni admovicca ad zamiežnaha kantentu na ŭłasnych telekanałach, ale i vyjści na rynki susiednich krain. Čamu nie ŭkraincy ŭ nas kuplajuć prahramy, a my ŭ ich?», — tak hučała pytańnie.
«Prablemy tut hłybinnyja, — skazaŭ Ejsmant. — Havorka i pra pamier rekłamnaha rynku, abjom srodkaŭ u industryi, i pra kadry — mnohija źjechali ŭ Rasiju i Ukrainu. Nam i čysta fizična treba pašyracca, kab było dzie vyrablać hety kantent. Tut havorka taksama i pra fakultet žurnalistyki, jaki musić rychtavać bolš kadraŭ, skiravanych na sučasny, jakasny pradukt. Hruba kažučy, treba vučyć ich nie hazietu viarstać, a vučyć, jak dapamahčy telebačańniu zrabić krok napierad, kali student tudy trapiŭ. Heta ceły kompleks taki pytańniaŭ, jakija patrabujuć vyrašeńnia, kali my havorym pra zdolnaść kankuravać. Heta nie zaležyć ad adnaho chutkaha rašeńnia, tut doŭhaja razmova, dzie treba pa paličkach raskładvać. Ale my majem razumieńnie, što treba rabić, i pakrysie idziem u hety bok».
Taksama my pastavili pytańnie pra dziciačy kantent.
«U niezaležnaj Biełarusi niama dziciačaha kanała, niama ŭciamnych dziciačych prahram. Što my majem? Miadźviedzika Topu i Kałychanku, usiaho tolki, dyk kali čakać zruchaŭ?» — pacikavilisia my.
«Mnie vielmi chočacca, kab i dziciačy kanał byŭ, kab i pra pryrodu byŭ kanał. Ale heta budzie zaležać ad taho, jak my budziem raźvivacca. Heta ž budzie taki kanał, jaki nie pryniasie nijakaha prybytku. Jość užo «Biełaruś 3» i «Biełaruś 5», jakija ŭtrymlivaje Biełteleradyjokampanija. Pakul vysiłki skiravanyja na toje, kab zrabić bolš jakasnymi isnujučyja kanały, a potym padstupacca i da tych pytańniaŭ, što vy akreślili. Ja ž nie suprać! U dziaciej pavinien być svoj kanał», — adkazaŭ Ivan Ejsmant.
Jon adrazu abaznačyŭ sposab, jak hetuju situacyju možna źmianiać prosta ciapier, kali jość ludzi, hatovyja hetyja mulciki rabić.
«U efiry Biełteleradyjokampanii šmat prahram, jakija robiacca nie Biełteleradyjokampanijaj. My ich kuplajem. Tamu, kali chto moža, adčuvaje siły rabić mulciki, to chaj dašluć nam zajaŭku, my jaje razhledzim, abvieścim tvorčy konkurs… Kali heta budzie rabicca dla telekanała Biełaruś-3, to nijakich pytańniaŭ tut niama ŭžo siońnia», — zapeŭniŭ kiraŭnik chołdynha.
Taksama my spytalisia, u čym adroźnieńnie BT Ejsmanta ad BT Davydźki, ale toj nie zmoh adkazać, spasłaŭšysia na niedastatkovy čas u kreśle kiraŭnika dla analizu.
«Ci spraviadliva, što ŭ Biełarusi niama niedziaržaŭnaha telekanała?» — spytalisia taksama my.
«Mnie ciažka adkazać, nie ŭ majoj heta kampietencyi. Napeŭna, [niespraviadliva]. Ale kali kazać pra kankurencyju, to jaje chapaje: jość STB, ANT. Ale ŭ kabielnych sietkach tranślujucca dziasiatki, sotni kanałaŭ. Heta naŭprostavyja našyja kankurenty», — vykazaŭsia Ejsmant.
Dyk čamu biełarusy ŭ bolšaj stupieni hladziać i daviarajuć rasijskim kanałam, u jakich absalutna inšy paradak dnia?
«Heta ŭ ludziej treba spytać, čamu ŭ NTV dola vyšejšaja, heta pytańnie nie da mianie», — adkazaŭ kiraŭnik BT.
Apošniaj temaj jaho razvah staŭ internet. Jak dziaržaŭnyja miedyi pavinny siabie ŭ im pavodzić?
«Nam treba aktyŭniej. Vy, darečy, trochi kryvadušycie, kali publikujecie svoj rejtynh naviedvalnaści. Jon abjektyŭny, ale ŭ nas ža karparatyŭny sajt, nie navinavy. Jon raskazvaje pra kampaniju, ludziej, prajekty, nie pryciahvaje ŭvahu čytačoŭ. Ale nam treba być bolš aktyŭnymi, heta praŭda», — padsumavaŭ Ejsmant.
