U žniŭni 2017 hoda abaronca Kurapataŭ, maładafrontaviec Siarhiej Palčeŭski, źjechaŭ na Danbas i dałučyŭsia da dobraachvotnikaŭ, jakija supraćstajać uzbrojenym farmiravańniam prarasijskich bajevikoŭ.
Čytajcie: Chto hety Palčeŭski, jaki prykavaŭ siabie da MAZa ŭ Kurapatach?
Piotr Parašenka niadaŭna vystupiŭ za ŭviadzieńnie bolš žorstkich praviłaŭ dla vydačy ŭkrainskaha hramadzianstva.
«Biełaruski partyzan» daviedaŭsia, jak vajna paŭpłyvała na Siarhieja i što jon źbirajecca rabić dalej.
Daviedka: Padčas abarony Kurapataŭ u lutym 2017 hoda Siarhiej Palčeŭski ŭ znak pratestu prykavaŭ siabie kajdankami da bampiera hruzavika. Na chvali sakavickich represijaŭ, 22 sakavika, Palčeŭski byŭ zatrymany i źmieščany pad vartu ŭ SIZA KDB pa abvinavačvańni ŭ padrychtoŭcy masavych biesparadkaŭ. U siaredzinie krasavika jon vyjšaŭ na volu i nieŭzabavie pryznaŭsia, što padpisaŭ papieru ab tajemnym supracoŭnictvie ź biełaruskimi śpiecsłužbami. 2 červienia KDB spyniŭ kryminalnuju spravu ŭ dačynieńni da Palčeŭskaha.
— Ja zaraz nie na Danbasie. Ja ŭžo miesiac znachodžusia ŭ Kijevie. Nazad ja pakul nie źbirajusia. Prynamsi, u vałanciorskija farmiravańni. Ja nie navučusia niečamu bolšamu, čamu ŭžo navučyŭsia, a siadzieć tam biez hrošaj nie baču sensu. Ja budu sprabavać niejak uładkavacca ŭ Kijevie. Ciapier ja jak pradstaŭnik «Maładoha frontu» ŭdzielničaju ŭ pracy arhkamiteta pa śviatkavańni Dnia Voli ŭ Kijevie. Płanujecca šeście ad Majdana Niezaležnaści da pomnika Karatkieviču kala biełaruskaj ambasady.
Siarhiej Palčeŭski prykavaŭ siabie da bampiera padčas akcyi pa abarony Kurapataŭ.
Kali ž prymalnaha varyjantu ŭ Kijevie nie znajdu, pajdu na kantrakt va Uzbrojenyja siły Ukrainy. Zaraz tam narmalnyja zarobki navat pa biełaruskich mierkach. Atrad «Pahonia» pačaŭ akazvać dapamohu tym, chto choča pajści pa kantrakcie, dy i siarod našych chłopcaŭ z taktyčnaj hrupy «Biełaruś» mnohija ŭžo słužać pa kantrakcie. Praceduru my viedajem. Da taho ž, i ŭ dobraachvotnych bataljonach, i ŭ VSU jość niedachop ludziej, tamu na kantrakt pajści — nie vielmi vialikaja prablema. Adzinaje, što jon padpisvajecca minimum na 3 hady.
Kali raptam zdarycca vialikaje nastupleńnie ruskich, tady nie tolki ja, ale i tysiačy byłych dobraachvotnikaŭ z usioj Ukrainy, iznoŭ pajeduć na front. Ale ciapier takoje raźvićcio padziej zdajecca mnie małavierahodnym.
Zaraz na froncie adnosna cicha. Kali ja tolki pryjechaŭ, byli bolš-mienš surjoznyja bai, kožny dzień pa niekalki hadzin vajavali. Ale ź ciaham času intensiŭnaść bajavych dziejańniaŭ źnižałasia, ciapier bai zaviazvajucca redka, ale šmat pracujuć snajpiery. Ja paźmienna chadziŭ na pazicyi. 12 hadzinaŭ na pazicyi, sutki doma. Byvaŭ i inšy hrafik. Tak zvany dom i pazicyja mahli być i ŭ adnym budynku. Rašeńnie bytavych spraŭ i dziažurstva na pazicyi i ŭjaŭlajuć saboj usiu słužbu. Ramantyki tam mała.
— Što budzie z dobraachvotnikami, jakija ŭžo nie zmohuć viarnucca pry hetaj uładzie ŭ Biełaruś? Tolki kali ŭ turmu…
— Tyja, chto zaraz słužyć u VSU, atrymajuć status udzielnika bajavych dziejańniaŭ i inšyja lhoty, im budzie praściej aformić dakumienty. Astatnija, mahčyma buduć emihravać u inšyja krainy. Ale ja viedaju mała ludziej, chto źjechaŭ. Pakul što ŭsie zastajucca va Ukrainie.
— Jak źmianiła Vas vajna?
— Vierniki, kali sadziacca jeści, dziakujuć Bohu za ježu. Voś vajna i navučyła mianie być udziačnym za hetyja maleńkija radaści žyćcia, jak prostaja ježa i samo žyćcio, jakoje vielmi lohka stracić. Samaje ciažkaje na vajnie — heta bačyć śmierć svajho pabracima. Tamu, kali chočacie atrymać pravilnaje staŭleńnie da žyćcia, idzicie ŭ carkvu ci na vajnu. Lepš u carkvu, na vajnie, pakul zrazumiejecie, moža być užo pozna.
Mnohija ludzi ŭ Biełarusi ličać, što čym horš, tym lepš. Ale mnie zdajecca, lepš jašče 10 hod dyktatury Łukašenki, čym vajna ŭ Biełarusi. Kali budzie vajna, to nikomu ŭžo nie patrebna budzie ni demakratyja, ni niezaležnaść, usie buduć dumać tolki jak vyžyć. Niekatoryja buduć dumać, jak vyžyć na vajnie. Heta tyja, kamu sumleńnie nie dazvolić nie iści na vajnu.
Na Łukašenku, viadoma, treba cisnuć i praz pratestnyja akcyi, ale pakul nie treba davodzić da revalucyi. Rasija jašče nie takaja słabaja, kab nie ŭmiašacca ŭ situacyju ŭ vypadku revalucyi. Kali jość mahčymaść damaŭlacca biez vajny, treba joj karystacca. Vajna — heta apošni srodak.
