Z nahody 100-hodździa adnaŭleńnia Litoŭskaj dziaržavy 16 lutaha ŭ Vilni z Kafiedralnaj płoščy da mohiłak Rosy (na ich pachavanyja padpisanty Akta 16 lutaha Jonas Basanavičus i Jonas Vilejšys) prajšła tysiačnaja kałona žycharoŭ.
Delfi.lt
Pa dadzienych palicyi, na šeście sabralisia 2000—3000 čałaviek, bolšaja ich častka — školniki, ale ź imi išli siemji ź dziećmi, moładź i pažyłyja ludzi.
Prysutnych sa sceny vitaŭ akcior, jaki hraŭ rolu patryjarcha litoŭskaha nacyjanalnaha ruchu Jonasa Basanavičusa — jon paradavaŭsia, što niadaŭna ŭ Niamieččynie byŭ znojdzieny Akt ad 16 lutaha, ale razam z tym zaŭvažyŭ, što heta — usiaho tolki dakumient, a samaje hałoŭnaje - ideja niezaležnaści. «Ja pryjšoŭ skazać vam, kab šukali niezaležnaść nie ŭ archivach, nie ŭ muziejach, heta važny dakumient, ale na samoj spravie heta tolki papiera, dakumient. Šukajcie niezaležnaść u svaich sercach i hałovach, vy pavinny znajści heta siońnia, kali dumajecie pra budučyniu krainy», — skazaŭ jon.
Šeście moładzi 16 lutaha «Darohi Litoŭskaj dziaržavy» prachodzić treci hod zapar. Kałona rušyła z Kafiedralnaj płoščy i prajšła mima važnych histaryčnych budynkaŭ i miescaŭ: mima Doma sihnataraŭ, dzie byŭ padpisany Akt, mima fiłarmonii, dzie ŭ pačatku minułaha stahodździa zasiadaŭ Vilenski Sojm, jaki zapatrabavaŭ niezaležnaści Litvy (usiaho naviedana 16 abjektaŭ).
Praz tydzień 100-hodździe niezaležnaści budzie adznačać Estonija.