U Miadziele skončana rasśledavańnie kryminalnaj spravy pa padpale milicejskaj mašyny «Łada Pryjora» ŭ haražy adździaleńnia milicyi pasiołka Narač. Śledčyja pieradali spravu prakuroru Miadzielskaha rajona dla nakiravańnia ŭ sud.
Prakuror Ivan Małafiej raspavioŭ kraj.by, što ŭ ździajśnieńni złačynstva abvinavačvajecca 22-hadovy žychar kurortnaha pasiołka Narač.
Złačynstva było ździejśniena ŭnačy 5 kastryčnika 2017 hoda. Kala 3.30 pjany 22-hadovy žychar pasiołka, u jakoha supracoŭniki DAI napiaredadni zabrali mapied «Delta», zalez u słužbovy haraž adździaleńnia milicyi, kamieniem źbiŭšy naviasny zamok u dźviarach.
U haražy stajali dźvie milicejskija mašyny «Łada Pryjora» i mapied abvinavačanaha. Pavodle papiaredniaj viersii śledstva, chłopiec źliŭ bienzin z mapieda, abliŭ im pravaje piaredniaje koła adnoj z mašyn i padpaliŭ jaho.
Mašyna zaharełasia. Ahoń pierakinuŭsia na druhi aŭtamabil, a taksama na dach haraža.
U vyniku pažaru «Łada», jakuju padpaliŭ złamyśnik, źniščana całkam. Razam ź joj zhareli sihnalnaja hukaŭzmacnialnaja ŭstanoŭka, radyjostancyja, avaryjny darožny znak, aŭtamabilnaja aptečka i 17 litraŭ bienzinu. Druhi aŭtamabil paškodžany častkova. Ahoń taksama začapiŭ dach haraža.
Ahulnaja škoda, pryčynienaja miadzielskaj milicyi, aceńvajecca ŭ 9 833 rubli 29 kapiejek, što źjaŭlajecca bujnym pamieram.
Abvinavačany maje siaredniuju adukacyju, časova nie pracuje, nie sudzimy, nie žanaty.
Kryminalnaja sprava była zaviedzienaja i rasśledavałasia pa druhoj častcy artykuła 218 Kryminalnaha kodeksa Respubliki Biełaruś «Naŭmysnaje źniščeńnie abo paškodžańnie majomaści, ździejśnienaje ahulnaniebiaśpiečnym sposabam, što paciahnuła pryčynieńnie škody ŭ bujnym pamiery».
Złačynstva karajecca abmiežavańniem voli da piaci hadoŭ abo pazbaŭleńniem voli ad troch da dziesiaci hadoŭ.
