Zajavu ab adstaŭcy Saad Charyry začytaŭ u Er-Ryjadzie.
Niezvyčajnaja i pavučalnaja historyja adbyłasia na Blizkim Uschodzie. Premjer-ministr Livana zajaviŭ pra svaju adstaŭku. Heta zdaryłasia ŭ minułuju subotu, kali jon znachodziŭsia ŭ Saudaŭskaj Aravii. Paśla taho jon na publicy bolš nie źjaŭlaŭsia.
Premjer-ministr Livana Saad Charyry — sunit. I jon doŭhi čas karystaŭsia padtrymkaj sunickaj Saudaŭskaj Aravii.
Livan — 6-miljonnaja pa kolkaści nasielnictva kraina, ale pa terytoryi jana roŭnaja ŭsiaho tolki treciaj častcy Bresckaj vobłaści. Na hetym łapiku ziamli na bierazie Mižziemnaha mora ad časoŭ antyčnaści žyvuć dziasiatki roznych nacyjanalnaściej i plamion.
U XX st. dziesiacihodździami tam išła hramadzianskaja vajna «ŭsich suprać usich». Chistki mir ustalavaŭsia tolki ŭ 1990-ja.
Pavodle daŭniaha mirnaha pahadnieńnia, prezidentam Livana vybirajuć chryścijanina-maranita. Post premjera zajmaje sunit, a staršynia parłamienta — šyit. Hety padzieł byŭ zaćvierdžany šmat dziesiacihodździaŭ tamu i adpaviadaŭ bałansu sił u krainie na toj momant.
Pierapisaŭ u Livanie nie pravodziłasia ad 1932 hoda, bo jany mahli b pakazać demahrafičnyja pieramieny. Choć na siońnia ŭ vyniku bolšaj naradžalnaści dola šyitaŭ u krainie vyrasła, a chryścijan — upała.
Šyitaŭ tradycyjna padtrymlivaje Iran, sunitaŭ finansuje Saudaŭskaja Aravija, chryścijanie majuć lepšyja suviazi z Francyjaj i Izrailem. Na siońnia isnuje kaalicyja prezidenta-chryścijanina Mišela Auna i šyickaha ruchu «Chiezbałach». Saudaŭskaja Aravija, imavierna, zmusiła Charyry da adstaŭki. Mahčyma, tamu, što jon niedastatkova impetna zmahaŭsia suprać «Chiezbałach» i irancaŭ.
Zajava Charyry i jahonaje źniknieńnie z radaraŭ vyklikała supiarečlivyja reakcyi ŭ Livanie i za jaho miežami. Prezident Aun zapatrabavaŭ viartańnia premjera ŭ krainu. Ministerstva zamiežnych spraŭ Francyi taksama vykazała mierkavańnie, što Charyry ŭtrymlivajuć u Er-Ryjadzie siłaj.
47-hadovy Saad Charyry — syn inšaha premjera Livana, Rafika Charyry, zabitaha ŭ 2005 hodzie.
Bahataja naftaj Saudaŭskaja Aravija viadzie ahresiŭnuju zamiežnuju palityku, zmahajučysia ź Iranam za ŭpłyŭ u Siryi, Jemienie, Livanie, Katary i Bachrejnie.
