Nad krainami Jeŭropy ŭ apošni tydzień vieraśnia prajšło vobłaka radyjeaktyŭnaha zabrudžańnia, jakoje mahło ŭtvarycca ŭ vyniku ŭciečki ruteniju-106 na terytoryi Rasii ci Kazachstana. Pra heta zajaviŭ Francuzski instytut jadziernaj biaśpieki (IRSN), paviedamlaje Reuters.
Ilustracyjnaje fota
IRSN vyklučyŭ, što heta nastupstvy avaryi na jadziernym reaktary, zajaviŭšy, što incydent, vierahodna, adbyŭsia ŭ miescy zachoŭvańnia jadziernaha paliva abo centry radyjeaktyŭnaj miedycyny. IRSN adznačyŭ, što vobłaka nie naniesła škody zdaroŭju ludziej abo navakolnamu asiarodździu ŭ Jeŭropie.
IRSN adznačyŭ, što nie moža dakładna vyznačyć raźmiaščeńnie punktu vykidu radyjeaktyŭnych materyjałaŭ, ale na asnovie analizu umoŭ nadvorja najbolš vierahodnaja zona znachodzicca na poŭdzień ad Uralskich hor, pamiž Urałam i rakoj Vołha. Heta moža ŭkazvać na Rasiju ci, mahčyma, na Kazachstan.
«Rasiejskija ŭłady zajavili, što nie viedajuć pra padobny incydent na svajoj terytoryi», — skazaŭ dyrektar IRSN Žan-Mark Pieres. Jon dadaŭ, što instytut jašče nie kantaktavaŭ z uładami Kazachstana.
Pieres adznačyŭ, što ŭ apošnija tydni IRSN i šerah inšych instytutaŭ jadziernaj biaśpieki ŭ Jeŭropie fiksavali vysoki ŭzrovień ruteniju-106 — radyjenuklidu, jaki źjaŭlajecca praduktam raspadu atamaŭ ŭ jadziernym reaktary i jaki nie sustrakajecca ŭ pryrodzie.
Zhodna z acenkaj IRSN, kolkaść ruteniju-106 składała 100-300 terabiekierelaŭ, i kali b avaryja takoha maštabu adbyłasia ŭ Francyi, to ŭ radyjusie niekalkich kiłamietraŭ vakoł epicentra abaviazkova praviali b evakuacyju ludziej.
