U amierykanskim horadzie Chjustan, paciarpiełym ad najhoršaj pavodki za ŭsiu historyju, uviedzienaja kamiendanckaja hadzina, paviedamlaje VVS.
AFP
U vyniku praliŭnych daždžoŭ, jakija prynios urahan «Charvi», značnyja častki horada apynulisia pad vadoj. Pa mienšaj miery 15 čałaviek zahinuli, mnohija damy razburanyja.
Pa słovach mera Chjustana Silviestra Terniera, kamiendanckaja hadzina nieabchodnaja dla baraćby z maraderstvam.
Chjustan — čaćviorty pa pamierach horad ZŠA.
Prezident Donald Tramp u aŭtorak pryjechaŭ u Techas, kab asabista acanić maštaby razbureńniaŭ. «Hety ŭrahan, jon epičny. Ale viedajecie, heta adbyłosia ŭ Techasie, a Techas z usim moža spravicca», — skazaŭ prezident.
Raniej uzrovień vady ŭ miascovym vadaschoviščy padniaŭsia da krytyčnaha, i vada pačała pieralivacca praz dambu Adziks.
Kamiendanckaja hadzina ŭviedzienaja z paŭnočy da 5 hadzin ranicy pa miascovym časie — na niavyznačany termin. Pad jaje dziejańnie nie traplajuć vałanciory, supracoŭniki ekstrannych słužbaŭ i ludzi, jakim u hety čas treba dabiracca na pracu abo ź jaje.
Pa słovach Terniera, jana ŭviedzienaja dla taho, kab praduchilić kradziež u evakujavanych damach.
Raniej haradskija ŭłady paviedamlali pra vypadki maradziorstva i ŭzbrojenych rabavańniaŭ, a taksama ludziej, jakija vydajuć siabie za palicejskich.
Svaje damy ŭ horadzie pakinuli tysiačy žycharoŭ.
U aŭtorak Nacyjanalnaja mietearałahičnaja słužba paviedamiła, što kolkaść apadkaŭ u Techasie pabiła novy rekord dla kantynientalnaj častki ZŠA. Śpiecyjalisty zafiksavali 132 sm apadkaŭ ź piatnicy.
Tramp raniej abviaściŭ ab uviadzieńni nadzvyčajnaha stanovišča ŭ Techasie i Łuizijanie. Hetaja miera dazvalaje akazvać ekstrannaje finansavańnie i pradprymać inšyja kroki, nakiravanyja na baraćbu z nastupstvami stychii.
Urahanu «Charvi» spačatku była nadadzienaja 4-ja katehoryja składanaści, ale pa miery jaho prasoŭvańnia ŭhłyb kantynienta katehoryja była panižanaja da trapičnaha štormu.
Tym nie mienš, u bližejšyja dni praliŭnyja daždžy, jak čakajecca, praciahnucca.
