U indyjskim štacie Charjana padčas biesparadkaŭ zahinuli nie mienš jak 17 čałaviek, kala 70 atrymali roznyja ranieńni, paviedamlajuć infarmahienctvy.
India Today
Biesparadki ŭ horadzie Pančakuła, jakija pryviali da hibieli ludziej, pačalisia paśla suda nad viadomym u Indyi duchoŭnym nastaŭnikam, kiraŭnikom relihijnaj supołki «Dera Sača Saŭda». Huru Ram Rachim Sinhch byŭ pryznany vinavatym u zhvałtavańni dźviuch svaich paśladoŭnic.
Paśla abviaščeńnia vierdyktu natoŭpu prychilnikaŭ huru pačali atakavać palicejskija aŭtamabili, zakidvać kamianiami i pałkami vartavych paradku. Raźjušany natoŭp padpaliŭ aŭtazapraŭku i čyhunačnuju stancyju. Palicyja była vymušanaja ŭžyć ślozaciečny haz suprać pratestoŭcaŭ, na dapamohu joj pierakidvajucca vajskovyja padraździaleńni.
Pavodle infarmacyi niekatorych ŚMI, biesparadki pačalisia i ŭ inšych haradach Charjany. Ułady ŭvodziać pavyšanyja miery biaśpieki ŭ stalicy Ńju-Deli.
Ram Rachim Sinhch karystajecca papularnaściu siarod kasty niedatykalnych i biedniakoŭ, bo prapahanduje admovu ad kastavaj niaroŭnaści i realizuje dabračynnyja prahramy. Jon lubić raskošnaje žyćcio, jarka i doraha apranajecca, zdymajecca ŭ kino, vypuskaje svaje muzyčnyja dyski. Na sud huru prybyŭ u supravadžeńni kavalkady aŭtamabilaŭ-usiedarožnikaŭ. Sam huru śćviardžaje, što kolkaść jaho prychilnikaŭ naličvaje 60 młn čałaviek.
