Papa Rymski na cyrymonii kananizacyi.
Papa Rymski Francišak ździejśniŭ u niadzielu, 16 kastryčnika, abrad kananizacyi, abviaściŭšy śviatymi katalickaj carkvy siem błahasłaŭlonych — dvuch pakutnikaŭ, troch zasnavalnikaŭ manaskich ordenaŭ, adnaho prostaha śviatara i adnu manašku. Cyrymonija adbyłasia na płoščy pierad saboram śviatoha Piatra ŭ Vatykanie.
Śviatymi stali francuz Sałamon Leklerk (1745 — 1792) i mieksikaniec Chase Sančes Del-Rya (1913 — 1928), jakija stali achviarami revalucyj u svaich krainach.
Siarod troch zasnavalnikaŭ manaskich ordenaŭ najbolš viadomym źjaŭlajecca italjaniec Ludovik Pavonia (1784 — 1849), jaki zasnavaŭ ŭ 1847 hodzie «Kanhrehacyju Synoŭ Maryi Biezzahanna Začataj» — manaski orden, jaki dapamahaŭ biednym i biespracoŭnym maładym ludziam.
Abvieščany śviatym italjaniec Alfons Marya Fusk (1839 — 1910) zasnavaŭ žanočy manaski orden, jaki dapamahaŭ biednym sialanam. Ispanski biskup Manuel Hansales Harsija (1877 — 1940) zasnavaŭ dźvie manaskija kanhrehacyi.
Da liku śviatych pantyfik pryličyŭ taksama prostaha arhientynskaha śviatara Chase Habryela del Rasaryja Bračera (1840 — 1914), jaki pryśviaciŭ žyćcio dapamozie biednym i chvorym, i siastru Elizabetu ad Najśviaciejšaj Trojcy z Ordenu Karmelitanak Bosych (1880 — 1906).
Abviaščeńnie śviatym u katalictvie źjaŭlajecca druhoj stadyjaj prasłaŭleńnia, jakaja idzie paśla bieatyfikacyi (pryličeńnia da liku błasłavionych).
U asobnaj zajavie 13 kastryčnika Vatykan paviedamiŭ, što Kanhrehacyja kananizacyi śviatych z adabreńnia Papy Franciška vydała dekrety, jakija śviedčać ab «hieraičnych dabradziejnych spravach» čatyroch čałaviek, jakija ciapier atrymajuć prava na bieatyfikacyju, kali jaki-niebudź cud budzie prypisany ich zastupnictvu. Heta dva ispanskich śviatara, a taksama manach i manachinia ź Italii.
