Ledź nie adzinaja intryha parłamienckich vybaraŭ-2016 — ci prapuściać u parłamient pradstaŭnicu «Havary praŭdu» Taćcianu Karatkievič.
Nahadajem, padčas letašnich prezidenckich vybaraŭ Karatkievič była adzinaj pradstaŭnicaj niezaležnaha hramadstva, čyjo imia było ŭ vybarčych biuleteniach.
Jaje asnoŭny kankurent na vybarach-2016 — 36-hadovy načalnik stancyi «Minsk-Pasažyrski» Alaksandr Dražža. Ci možna jaho ličyć uchvalenym pradstaŭnikom prezidenckaj viertykali? Vyhladaje, što tak.
Alaksandr Dražža.
Biaspłatnaja hazieta «Viečiernij Minsk» (uvachodzić u chołdynh «Minsk-Naviny», zasnavalnikam jakoha źjaŭlajecca Minharvykankam) sa 100-tysiačnym nakładam praciahvaje rubryku «Pra čas. Pra krainu. Pra siabie». U jaje ramkach drukujucca manałohi dziaržaŭnych dziejačaŭ i pradstaŭnikoŭ hramadskaści.
Čyje dumki byli apublikavanyja apošnim časam? Naprykład, na staronkach «Viečiernieho Minska» źjavilisia Valeryj Baradzienia i Ludmiła Kubrakova — heta deputaty pałaty pradstaŭnikoŭ, jakija źbirajucca pieraabiracca pa minskich akruhach.
Miesiac tamu byŭ Valeryj Kursievič — dyrektar Minskaha rysornaha zavoda, jaki ŭvachodzić u strukturu MAZ. Jak vyjaviłasia, jon taksama bałatujecca ŭ deputaty jak hałoŭny pradstaŭnik ad ułady pa akruzie №92.
I voś hierojem čarhovaha numaru «Viečiernieho Minska» staŭ Alaksandr Dražža. Načalnik stancyi «Minsk-Pasažyrski» pradstaŭleny jak paśpiachovy mieniedžar.
«Štomiesiac absłuhoŭvajem bolš za miljon pasažyraŭ i starajemsia rabić usio, kab jany adčuvali siabie ŭtulna. Tak, u 2010 hodzie ŭ nas adkryłasia zała čakańnia pavyšanaj kamfortnaści — servis-centr «Kłub SV». U im možna pravodzić dziełavyja sustrečy, karystacca internietam, atrymać biaspłatny čaj ci kavu, biez čarhi kupić bilet dla pajezdki ŭ harady Biełarusi, krain SND i Bałtyi. Administratar zały zabraniruje pasažyru haścinicu, prapanuje ekskursiju pa Minsku abo inšych znakavych miaścinach Siniavokaj, vykliča taksi, raskaža pra maršruty hramadskaha transpartu, zamović stolik u restaranie…», — raskazvaje jon pra pośpiechi svajoj pracy.
«Niadaŭna rekanstrujavali zału čakańnia na trecim paviersie vakzała. Ustalavali tam elektronnaje tabło, na jakim infarmacyja adlustroŭvajecca na ruskaj i anhlijskaj movach, pa prośbie pasažyraŭ abstalavali zału pryładaj dla zaradki mabilnych telefonaŭ», — praciahvaje Dražža.
«U našaj krainie robicca ŭsio mahčymaje, kab palepšyć uzrovień žyćcia nasielnictva. Biełaruskaja čyhunka ŭ svaju čarhu kłapocicca pra kamfort i jakaści absłuhoŭvańnia pasažyraŭ. Aktyŭnymi tempami idzie abnaŭleńnie ruchomaha składu, raźvivajecca infrastruktura», — upeŭnieny jon.
* * *
Alaksandr Dražža naradziŭsia ŭ Homieli ŭ 1980 hodzie. Maje try vyšejšyja adukacyi — Akademiju kiravańnia i dvojčy Biełaruski dziaržaŭny univiersitet transpartu.
