Biełaruski muzykant i bitmejkier, bubnač hurtu IQ48 Anton Maculevič (Tony Fadd) vykłaŭ svaju muzyku ŭ volny dostup u siecivie. Jana spadabałasia maładomu amerykanskamu reperu Ŭili Maksvełu (Fetty Wap), jaki napisaŭ na jaje słovy.
Ich sumiesny synhł «Trap Queen» streliŭ nievierahodna: dasiahnuŭ 2-j pazycyi ŭ Billboard, staŭ platynavym u Amerycy, Novaj Zelandyi i Danii, załatym u Aŭstralii i Vialikabrytanii.
Jaho kolkaść prahladaŭ na Youtube imkniecca da 400 miljonaŭ prahladaŭ (na Soundcloud jašče 127 miljonaŭ prasłuchoŭvańniaŭ).
Trek zacanili Jay-Z i Bijonsej dy pieraśpiavali Ed Šyran i Tejłar Śvift, jakija na siońnia ŭvachodziać u trojku samych paśpiachovych vykanaŭcaŭ u śviecie. Rolik na pieśniu pryznany najlepšym videa debiutanta na MTV Video Music Awards.
Na hałoŭnaj hip-hop premii ŭ ZŠA BET Hip Hop Awards hetaja praca pryznanaja pieśniaj hodu, a sam Anton nazvany pradusaram hodu (pradusar u ich razumieńni — toj, chto ŭkładajecca ŭmieńniami dy talentam u muzyku, a nie hrašyma i suviaziami, jak u paniaćci rasiejskim).
Nu i samy istotny i histaryčny fakt, jak dla biełaruskaj muzyki — upieršyniu biełarus staŭ naminantam premii «Hremi». Trek Antona Maculeviča «Trap Queen» pretenduje na pieramohu ŭ naminacyi «Najlepšaja rep-pieśnia»
(u naminantach tut taksama «All Day» Kańje Ŭesta z Połam Makartni, «Alright» Kiendryka Łamara, «Energy» Drejka i «Glory» Common & John Legend). Vykanaŭca «Trap Queen» Fetty Wap maje jašče i naminacyju «Najlepšy rep-vystup».
Anton Maculevič atrymaŭ užo prapanovy ab supracy ad inšych artystaŭ. Nieŭzabavie trek na jaho muzyku prezentuje Fall Out Boy. Pry hetym praciahvaje hrać u IQ48, a niadaŭna paŭdzielničaŭ u zapisie novaj pieśni hurtu:B:N: «Chvali».
