Džordž Marcin i vykanaŭcy hałoŭnych rolaŭ u sieryjale «Hulnia tronaŭ». Fota: Jason LeVaris
Piśmieńnik Džordž R. R. Marcin, aŭtar cykłu ramanaŭ «Pieśnia lodu i połymia», pavodle jakoha zdymajecca sieryjał «Hulnia tronaŭ», raspavioŭ The Observer pra svajo bačańnie zaviaršeńnia cykłu.
Marcin jašče nie dapisaŭ apošniuju knihu «Pieśni lodu i połymia», jon nie viedaje, jak dakładna składucca abstaviny. Ale choča stvaryć «horka-sałodki» finał u tradycyjach Tołkijena.
Žurnalist spytaŭ Marcina pra zaviaršeńnie sieryi: maŭlaŭ, hałoŭnaje, što ŭ jaho pytajuć, ci skončycca sieryja strašennym apakalipsisam.
«Heta dakładna nie moj padychod, — adkazaŭ Marcin, jakoha žurnalist nazvaŭ «revizijanistam fentezi». — Ja kazaŭ raniej, što ton raźviazki, da jakoha ja imknusia, budzie horka-sałodkim. U sensie, nie sakret, što na mianie vialiki ŭpłyŭ mieŭ Tołkijen, i što mnie padabajecca, jak skončyŭsia «Uładar Piarścionkaŭ». Jon skančajecca pieramohaj, ale heta horkaja pieramoha».
Piśmieńnik adznačaje, što ŭ kancy historyi Froda nikoli nie stanie takim, jak byŭ raniej, jon vymušany syści ŭ Nieśmiarotnyja ziemli, tym časam astatnija zastanucca žyć zvyčajnym žyćciom.
«[Hłava «Uładara Piarścionkaŭ»] «Apahanienaja Chabitanija» — vydatny tvor, jaki ja nie razumieŭ, kali mnie było 13. Čamu heta tut? Što, historyja skončyłasia? Ale štoraz, jak ja potym čytaŭ jaje, ja asensoŭvaŭ daskanałaść hetaj častki bolš i bolš, — pryhadvaje Marcin. — Usio, što ja mahu skazać, što heta toj ton, da jakoha ja imknusia. Atrymajecca ŭ mianie ci nie, heta aceniać ludzi jak vy i maje čytačy».
Akramia taho, piśmieńnik nazvaŭ našy dni «załatym viekam» telebačańnia, kali žurnalist zhadaŭ sieryjały «Varjaty», «Va ŭsie ciažkija» i «Padpolnaja impieryja» u adkaz na pytańnie Marcina, što žurnalist budzie rabić, kali skončycca «Hulnia tronaŭ».
***
Na siońnia Marcin skončvaje rabotu nad šostaj knihaj «Pieśni…», «Viatry zimy», što maje stać pieradapošniaj u cykle. Apošniaja mierkavana budzie mieć nazvu «Mary pra viasnu». Daty vychadu nieviadomyja. Knihi asnoŭnaha cykłu čaściej za ŭsio vychodzili ź vialikimi pierapynkami: u 1996, 1999, 2000, 2005, 2011 hadach. Miž imi vychodzili śpin-ofy i prykveły pad redakcyjaj Marcina.
Telesieryjał maje zavieršycca praz try siezony, ale pa jaho zaviaršeńni davoli imaviernyja zdymki prykveła.
Hladzicie taksama: 7 sieryjałaŭ, što varta pahladzieć hetym letam
