Ministerstva ekanomiki Biełarusi prapanoŭvaje raździalić funkcyi dziaržavy jak ułaśnika i jak rehulatara, paviedamiŭ namieśnik ministra ekanomiki Alaksandr Jarašenka na bryfinhu 30 lipienia.
Jarašenka adznačyŭ, što tema kiravańnia dziaržavaj svajoj ułasnaściu źjaŭlajecca aktualnaj i Minekanomiki siońnia vystupaje z adpaviednymi prapanovami. «My ŭnosim prapanovu padzialić funkcyi dziaržavy jak ułaśnika i jak rehulatara. Naša prapanova zaklučajecca ŭ tym, kab u krainie byŭ asobny orhan dziaržkiravańnia, jaki b abjadnoŭvaŭ u sabie funkcyi kampietentnaha, efiektyŭnaha kiravańnia dziaržaŭnaj ułasnaściu», — skazaŭ namieśnik ministra.
Pavodle jaho mierkavańnia, tema pavyšeńnia efiektyŭnaści kiravańnia dziaržsiektaram źjaŭlajecca vielmi składanaj, pakolki nieabchodna vyrašyć kadravaje pytańnie. «Spatrebiacca kampietentnyja kadry, z tym kab kiravańniem u adpaviednych orhanach haspadarčych tavarystvaŭ ź dziarždolaj śpiecyjalisty zajmalisia jak prafiesijnaj dziejnaściu, a nie pa sumiaščalnictvie ź inšaj pracaj», — padkreśliŭ Jarašenka.
Pavodle jaho słoŭ, pytańni ŭdaskanaleńnia karparatyŭnaha kiravańnia pradpryjemstvaŭ ź dziarždolaj siońnia razhladajucca na ŭzroŭni Ministerstva ekanomiki i Dziaržaŭnaha kamiteta pa majomaści.
«U kančatkovym vyniku nieabchodna zabiaśpiečyć efiektyŭnaje kiravańnie, a samaje hałoŭnaje — efiektyŭnaje funkcyjanavańnie dziaržaŭnaha siektara», — reziumavaŭ Jarašenka.
