Minskaje «Dynama» bliskuča vykanała zadaču vychadu ŭ treci kvalifikacyjny raŭnd Lihi Jeŭropy. Siońnia na stadyjonie «Traktar» biełaruski kłub katkom prajšoŭsia pa bałharskim «Čornym mory».
Siektar haściej.
Pieršy hoł!
Siońnia ŭdzień u Minsku krychu daždžyła, mabyć, praz hetuju akaličnaść na trybunach nie daličylisia kolki sotniaŭ, a to i tysiač zaŭziataraŭ. Padałosia, što na stadyjonie sabrałasia tysiač 6-7 hledačoŭ. A voś fanataŭ «Dynama» nie było zusim. Jany abvieścili bajkot hulniaŭ z pryčyny zanadta ščylnaha nadhladu. Z soniečnaj Varny ŭ Minsk pryjechała šaściora chłopcaŭ i dziaŭčat. Reśpiekt!
Matč tydniovaj daŭniny skončyŭsia ŭničyju 1:1. Heta davała stratehičnuju pieravahu minčukam, dziakujučy hołu na čužym poli. Kali kazać ščyra, to chvilin siemdziasiat matča ŭ Bałharyi «Čornaje mora» vaziła dynamaŭcaŭ. Paśla matča ŭ Minsku zusim niezrazumieła, jak takoje mahło zdarycca.
I trenier, i hulcy «Čornaha mora» samaŭpeŭniena kazali, što jeduć u Biełaruś tolki za pieramohaj. Maŭlaŭ, «Dynama» ničym nie ŭraziła, možna i navat patrebna pieramahać. Hulec «Dynama» Nienad Adamavič paśla hetaj hulni pryznaŭsia, što takija słovy zakranali jaho za žyvoje.
Trenier minčukoŭ Vuk Rašavič zrabiŭ niekalki zamien u paraŭnańni ź pieršym matčam. U paŭabaronie zamiest Bykava i Jedziharana vyjšli livijec Munir i Uładzimir Karyćka. Mienavita apošni, 36-hadovy vieteran biełaruskaha futboła, staŭ hierojem sustrečy.
Heta mienavita Karyćka raśpiačataŭ varoty Alaksandra Čanaviča (niekali jon hulaŭ u minskim «Dynama») sa štrafnoha na 41-aj chvilinie. Heta byŭ pieršy z klučavych momantaŭ sustrečy. Druhi adbyŭsia praź piać chvilin, kali za druhuju žoŭtuju kartku byŭ vydaleny hulec bałharskaj kamandy Pałankaŭ. Uvohule ŭkrainski arbitr nie saromiejeŭsia leźci ŭ kišeniu za papiaredžańnie. Za matč jon prademanstravaŭ až 9 kartak!
U druhim tajmie, majučy kolkasnuju pieravahu, «Dynama» nie pakinuła ad «čarnamorcaŭ» kamienia na kamieni. Asabliva šykoŭnym byŭ hoł Nienada Adamaviča, jaki advažyŭsia na ŭdar mietraŭ z 27! U bramnika bałhar dastać miač nie było nivodnaha šancu.
Paśla hetaha «Čornaje mora» pasypałasia. Zanadta vialikim razryvy stali pamiž abaronaj i atakaj. Minčuki jašče dvojčy zmahli skarystacca hetymi pustečami. Abodva miačy na rachunku čarnahorca Fatasa Biečyraja, abodva razy jamu pasavaŭ Uładzimir Karyćka — 4:0.
Trenier «Dynama» Vuk Rašavič adznačyŭ, što jaho kłub moh zabić jašče stolki ž. I heta praŭda! Da supraćstajańnia z «Ciurycham» «Dynama» padychodzić u dobrym nastroi.
Supiernikam «Dynama» ŭ 3-m raŭndzie budzie «Ciurych», 12-razovy čempijon Šviejcaryi.
U minułym hodzie «Ciurych» u šviejcarskaj Supierlizie finišavaŭ 3-m, čempijanat 2015-2016 tolki startavaŭ. U pieršym tury «Ciurych» zhulaŭ uničyju z «Janh Bojzam» — 1:1.
Matčy projduć 30 lipienia i 6 žniŭnia. Pryčym «Dynama» svoj chatni matč praviadzie ŭ Breście 6 žniŭnia. Stadyjon «Traktar» nie adpaviadaje ŭmovam praviadzieńnia 3-ha raŭndu.
Nahadajem, što hod tamu minčuki prabilisia ŭ hrupavy raŭnd Lihi Jeŭropy. Ale kab paŭtaryć pośpiech, treba prajści nie tolki 3-i raŭnd, ale i płej-of kvalifikacyi.
Siońnia viečaram salihorski «Šachcior» zhulaje ŭ haściach z aŭstryjskim «Volfśbierham» (pačatak u 21:30). Tydzień tamu salihorcy prajhrali na svaim poli ź likam 0:1.
