Fota z sajta rick.com
Za navinami na Facebook, jak i ŭ inšych sacyjalnych sietkach, ciažka sačyć. Da taho ž, kali bolšaść sacsietak daje stužku navin u chranałahičnym paradku, Facebook abiraje toje, što ličyć najbolš cikavym dla vas, i adkidaje patencyjna niecikavaje. Mnohim heta nie padabajecca: pra mnohija padziei možna ci daviedacca praz tydzień paśla taho, jak jany adbylisia, ci nie daviedacca naohuł. Jak vyrašyć Facebook.
Dumajecie, vašaja «razumnaja» stužka navin na Facebook — piekła z kučaj niecikavych pastoŭ? Pahladzicie sami, što najbolš čytajecie. Pasprabujcie pieraklučycca na chranałahičny vid stužki. Nie stała lepiej? Pieraklučajciesia nazad i pačytajcie parady nižej.
Ich na svaim Facebook (dzie ž jašče) daŭ Robiert Skobł, amierykanski błohier i były techničny jevanhielist Microsoft. Dakładny miechanizm vybaru pastoŭ dla pakazu na Facebook nieviadomy, ale niekatoryja jaho asablivaści amal vidavočnyja:
- Padzialiciesia tryma pastami inšych ludziej na cikavyja vam temy. Naprykład, kali padzieliciesia tryma zdymkami dziaciej vašaha siabra, pabačycie bolš zdymkaŭ dziaciej. Toje pracuje i z navinami palityki ci sportu albo fota kocikaŭ.
- Napišycie piać aryhinalnych pastoŭ pa adnoj cikavaj vam temie. Kali jany buduć pra ziemlatrus u Kalifornii, u stužcy stanie značna bolš pastoŭ pra hety samy ziemlatrus.
- Adklučycie stolki pryvatnaści, kolki možacie sabie kamfortna dazvolić. Niachaj inšyja viedajuć pra vas usio, što vam nie paškodzić. I dazvolcie inšym sačyć (Follow) za vašaj staronkaj. Vašyja pasty znojduć svaju aŭdytoryju, pra isnavańnie jakoj vy i nie zdahadvalisia. Darečy, intymnyja (u prystojnym sensie) rečy možna pościć nie publična, a tolki dla siamji ci supracoŭnikaŭ.
- Praviercie, kab vašaja bijahrafija była zapoŭnienaja, aktualnaja i publičnaja. Tady vas lohka znojduć siabry, byłyja adnakurśniki i supracoŭniki. Budzie cikaviej.
- Zaniasicie ŭsich (zusim usich!) cikavych vam siabroŭ u śpisy blizkich siabroŭ ci znajomych. Stužka navin stanie značna cikaviejšaj.
- Vydalicie ź siabroŭ tych, chto ničoha nie pościć i nie ŭzajemadziejničaje ź inšymi. Vašyja ŭłasnyja pasty paśla hetaha stanuć dasiahać bolšaj aŭdytoryi. Facebook spačatku pakazvaje vašyja pasty niekalkim ludziam. Kali hetyja ludzi nie nadali pastu nijakoj uvahi, post nie budzie pakazvacca inšym i budzie zaličany jak niecikavy.
- Pierakanajciesia, što sami łajkajecie, kamientujecie i rasšaryvajecie čužyja pasty. Heta pakaža sacsietcy, što vam samim cikava bačyć u navinach.
- Uručnuju schavajcie ŭsie niecikavyja naviny — naprykład, miemy, cytaty, sełfi. Dla hetaha ŭ kožnym niecikavym poście naciśnicie na strełačku ŭ pravym vierchnim vuhłu i abiarycie «ja nie žadaju heta bačyć». Tady Facebook pasprabuje schavać inšyja anałahičnyja pasty.
- Adpišyciesia (praz tuju ž knopku, paśla «ja nie žadaju» abiarycie «adpisacca ad…») ad nadta šumnych ludziej, navat kali heta vašyja svajaki. Kali što, ich naviny možna budzie pabačyć, kali pieraklučycca na «apošnija naviny» ci siarod navin pa śpisach siabroŭ.
- Praviarajcie staronku padziej (Events) prynamsi raz na miesiac. Adchilajcie niecikavyja vam prapanovy, pahadžajciesia na cikavyja. Tak budzie zručniej i vam samim, i pra cikavuju padzieju daviedajecca bolš ludziej.
- Raz na miesiac praviarajcie, ci nie źbilisia nałady na sajcie i ŭ mabilnaj prahramie dy asensujcie, što kožny punkt u naładach značyć.
- Uklučycie funkcyi biaśpieki kštałtu dvuchfaktarnaj aŭtentyfikacyi. Zrabicie toje samaje na pošcie i ŭ inšych internet-servisach. Była b dvuchfaktarnaja aŭtentyfikacyja ŭ Dženifier Łoŭrens, ź joj by nie zdaryłasia… Nu, vy pamiatajecie. Vy ž nie chočacie tak ža?
- Kali chočacie zavieści siabroŭ, pierakanajciesia, što ŭ vas jość dziasiatak publičnych pastoŭ, jakija pra vas niešta kažuć. Nie ździŭlajciesia, što vy nikomu nie cikavyja, kali vy sami pościcie tolki sełfi.
- Nie dazvalajcie inšym publikavać niešta na vašaj ścianie biez vašaha dazvołu. Niekatoryja lubiać publikavać łuchtu na čužych ścienach, a potym kryŭdziacca, što jaje vydalajuć.
- Zaviadzicie prynamsi 400 siabroŭ. U inšych karystalnikaŭ ludzi ź mienšaj kolkaściu siabroŭ vyklikajuć padazron — chutčej za ŭsio čałaviek niecikavy, kali maje mała siabroŭ.
- Kali vy źbirajeciesia dadać u siabry kahości, u kaho ŭžo 5 tysiač siabroŭ (maksimum na Facebook), pierakanajciesia, što majecie z tym čałaviekam prynamsi 50 ahulnych znajomych ci prosta nahadajcie, jak vy paznajomilisia — inačaj vas mohuć źličyć za «pustyšku» ci prosta spamiera.
- Bolšaść pastoŭ usio roŭna vam nie pakažacca ŭ stužcy navin, u lepšym vypadku 1 z 10 pastoŭ ad čałavieka. Kali vy zacikaŭlenyja ŭ kankretnych ludziach i ich navinach, prynamsi raz na tydzień zachodźcie na ich staronki dy łajkajcie i kamientujcie ich pasty. Albo zaniasicie hetkich ludziej u śpis i čytajcie naviny śpisu.
- Na telefonie dazvolcie hieałakacyju, kali chočacie čas ad času bačyć naviny pra toje, što adbyvajecca vakoł vas.
- Rabicie pasty praz sajt ci prahramy Facebook, a nie ekspartujcie naviny z Twitter ci UKantakcie albo starońnich prahram. «Naturalnyja» pasty pryciahvajuć bolš łajkaŭ i kamientaroŭ.
- Budźcie aktyŭnymi i ŭ kamientarach da čužych pastoŭ, i da svaich ułasnych. Heta daść nie tolki cikavyja dyskusii — adkamientavanyja vami pasty majuć lišni šaniec być pakazanymi vašym siabram.
- Pieraraźmiarkujcie błoki ŭ levaj ad navin kałoncy. Naviadzicie kursor na kožny punkt u kałoncy i adviadzicie troški laviej, kab źjaviłasia knopka-šaściaronka. Prybiarycie ŭsio niepatrebnaje.
- Staŭciesia da Facebook jak da stravy, jakuju vam padajuć. Jano-ta mo i smačna, ale pa hustu lepiej dadać soŭsu, pasalić ci papiarčyć. Pakažycie sacsietcy, što vam cikava i niecikava, a jaje karystalnikam — što ŭłasna vy cikavy čałaviek.
P.S. Kali vałodajecie anhlijskaj movaj, možacie spytać što zaŭhodna pra stužku navin u aŭtara prosta ŭ kamientarach da zapisa. Jon adkazvaje na praktyčna ŭsie cikavyja pytańni.
Čytajcie taksama:
Što pra nas viedajuć Google i Facebook, navošta im toje dy jak ad ich schavacca
50 asobaŭ u biełaruskim fejsbuku, na jakich varta padpisacca
