Ci praciahvaje haładoŭku Jury Rubcoŭ?
Žonka palitviaźnia Jadviha Rubcova kaža, što źviestak pra jaho nia maje ŭžo amal dva tydni.
«Apošni raz ź im bačyłasia advakat 17 krasavika, tady jon haładavaŭ. A što ciapier — nia viedaju. Dniami sama zvaniła ŭ śledčy izalatar u Baranavičy, dyk dziažurny skazaŭ, što ŭ ich nichto nie haładuje. Ale što jany mnie pa telefonie mahli inšaha skazać? Listoŭ ad jaho niama, zvankoŭ taksama. Dniami adpraviła jamu list, ale ci dojdzie, sumniavajusia. Što rabić — nia viedaju. Vielmi za jaho turbujusia. Jechać mnie samoj tudy biessensoŭna, bo ŭsio roŭna nia puściać. Čym dapamahčy?»
Što viadoma pra stan zdaroŭja Juryja Rubcova?
17 krasavika ź Juryjem Rubcovym sustrakałasia abaronca. Voś što jana raspaviała pra stan zdaroŭja palitviaźnia.
«Tady jon vyhladaŭ užo dosyć drenna. Sprabavała jaho adhavaryć, ale ž jon nia z tych, chto sastupaje. I ciapier nia dumaju, što jon sapraŭdy spyniŭ haładoŭku. Bo heta taki čałaviek».
17 krasavika advakat razam z Rubcovym skončyli aznajamleńnie z materyjałami kryminalnaj spravy. Pavodle padlikaŭ abaroncy, na pačatku tydnia spravu pavinny byli z prakuratury pieradać u sud. Dzień sudu jašče nie paviedamili, ale advakat miarkuje, što jaho pryznačać na druhuju pałovu traŭnia. Praces nad Juryjem Rubcovym adbudziecca ŭ Pružanach.
Z pačatku hodu homielski aktyvist Jury Rubcoŭ adbyvaŭ u Pružanskim rajonie 1,5 hoda «chimii» za źniavahu sudździ. Pracavać Jury Rubcoŭ nie pačaŭ, bo patrabavaŭ pracy z zarobkam nie nižejšym za siaredni pa krainie. Paśla taho jak Jury Rubcoŭ zrabiŭ sabie tatu z nadpisam «Łukašenka, sychodź», na jaho zaviali kryminalnuju spravu nibyta za ŭchileńnie ad adbyćcia pakarańnia i źmiaścili ŭ śledčy izalatar. 6 krasavika Jury Rubcoŭ abviaściŭ, što na znak pratestu suproć pieraśledu pačynaje haładoŭku. Padčas apošniaj sustrečy z advakatam Jury Rubcoŭ nie vyklučaŭ, što jamu daviadziecca sa zvyčajnaj haładoŭki pierachodzić na hetak zvanuju «suchuju», kali haładoŭnik admaŭlajecca i ad vady.
«Kali była ŭ śledčym izalatary, dyk papiaredziła administracyju, što jany adkaznyja za stan zdaroŭja viaźnia i musiać zabiaśpiečyć jamu rehularnyja medyčnyja ahlady i chutkuju dapamohu, kali spatrebicca. Mianie zapeŭnili, što ŭsio budzie narmalna, ale ci budzie hetak, prahnazavać ciažka», — skazała advakat Juryja Rubcova karespandentu Svabody.
Ci vyklikali da Juryja Rubcova medykaŭ, advakatu nieviadoma.
