Z prezidentam Hruzii, fota z fejsbuka Hieorhija Marhviełašvili
Nikomu siońnia nie dazvolena i nie pad siłu parušyć adzinstva pravasłaŭnych narodaŭ. Ab hetym zajaviŭ Alaksandr Łukašenka na sustrečy z Katalikosam-Patryjarcham usioj Hruzii, Archijepiskapam Mcchieckim i Tbiliskim, Mitrapalitam Picundskim i Suchum-Abchazskim Ilijoj II, paviedamlaje BiełTA.
«Našy narody zaŭsiody byli blizkija, i vaš bol, ź jakim vy skazali ab cełasnaści, ab svaim narodzie, nam blizki», — adznačyŭ kiraŭnik biełaruskaj dziaržavy.
«My budziem rabić usio, kab hruzinski narod jak maha chutčej pieraharnuŭ staronki niadaŭniaj historyi i zabyŭ hetyja dni. Sumna, što ŭ nas, u pravasłaŭnych narodaŭ, hetyja staronki źjavilisia», — skazaŭ Łukašenka.
Łukašenka źviarnuŭ uvahu na toje, što fundamientam luboha supracoŭnictva źjaŭlajecca ekanomika.
«I kali my siońnia majem tavaraabarot ŭsiaho $65 młn - śmiešnuju ličbu, tavaraabarot siarednich biźniesmienaŭ, to za hetyja dva dni my dasiahnuli damoŭlenaściej z vašymi pradprymalnikami na $200 młn, i pad kankretnyja damoŭlenaści zaklučany kantrakty», - dadaŭ kiraŭnik biełaruskaj dziaržavy. «My sieli za stoł pierahavoraŭ i damovilisia, što my pavinny dasiahnuć na praciahu biahučaha i budučaha hoda hetaha tavaraabarotu, i značyć, i dabrabytu dvuch narodaŭ», - adznačyŭ jon.
«Vy mnie skazali tolki što sam-nasam niečakana i ad dušy: «Narešcie my vas dačakalisia».
Dziakuj vam za toje, što vy čakali nie prezidenta Łukašenku, a pradstaŭnika biełaruskaha naroda — samaha dobraha, možna skazać, śviatoha naroda, miralubnaha, majučaha samyja vysokija dobryja pačućci da bratoŭ-hruzin», - padkreśliŭ jon.
