Čaćviorty fiestyval moładzi Minskaj jeparchii projdzie 18-19 lipienia i budzie prymierkavany da śviatkavańnia 70-hodździa Vialikaj Pieramohi.
Pra heta paviedamili BiełTA ŭ adździele pa spravach moładzi Minskaj jeparchii Biełaruskaj pravasłaŭnaj carkvy.
U hetym hodzie centralnym miescam praviadzieńnia forumu stanie historyka-kulturny kompleks «Linija Stalina», na terytoryi jakoha rychtujecca da adkryćcia kaplica ŭ imia śviatoha dabraviernaha kniazia Alaksandra Nieŭskaha. Dniom raniej, 18 lipienia, u chramie ŭ Zasłaŭi adbudziecca Boskaja liturhija ŭ pamiać prepadobnaha Sierhija Radaniežskaha.
«Sierhij Radaniežski — adna z klučavych fihur u spravie vyzvaleńnia Rusi ad manhoła-tatarskaha pryhniotu. Zatym pa mierapryjemstvach my pierachodzim da inšaha jarma, ale ŭžo niamiecka-fašysckaha, — rastłumačyli ideju praviadzieńnia forumu ŭ adździele pa spravach moładzi BPC. — Atrymlivajecca, što pamiać prepadobnaha Sierhija Radaniežskaha i naša mierapryjemstva na «Linii Stalina» abjadnoŭvajuć hetyja dźvie značnyja epochi».
Paśla liturhii ŭ Zasłaŭi ŭdzielniki fiestyvalu chresnym chodam adpraviacca na «Liniju Stalina».
«Chresny chod budzie nievialiki — kala siami kiłamietraŭ», — zaŭvažyli arhanizatary.
Śviatočnaja prahrama na «Linii Stalina» ciapier farmujecca, da jaje padrychtoŭki prapanujecca dałučycca pravasłaŭnym bractvam i ŭsim zacikaŭlenym arhanizacyjam. Akramia taho, da ŭdziełu zaprošany Biełaruski respublikanski sajuz moładzi.
Hladzi taksama: Rasijski mitrapalit Iłaryjon zaklikaje fanataŭ Stalina adumacca
