Na rasijskich šavinistyčnych i nacyjanalistyčnych sajtach praciahvajuć musolić temu admovy kiraŭnika Biełarusi 9 maja pryjechać na parad u honar 70-hodździa pieramohi ŭ Vialikaj ajčynnaj vajnie ŭ Maskvu.
Na hety raz temu padtrymaŭ palitołah Andrej Suzdalcaŭ. Toj samy, jaki ŭ 2006 hodzie byŭ departavany ź Biełarusi, a taksama pazbaŭleny vida na žycharstva. Ciapier Suzdalcaŭ pracuje namieśnikam dekana fakulteta suśvietnych ekanomiki i palityki ŭ maskoŭskim Nacyjanalnym daślednickim univiersitecie Vyšejšaj škoły ekanomiki.
Voś što Suzdalcaŭ napisaŭ pra admovu Łukašenki: «Kiraŭnik Biełarusi rychtuje vizit u Ryhu na samit «Uschodniaha partniorstva», i jamu ŭ hetych umovach było b vielmi niazručna akazacca ŭ liku niamnohich kiraŭnikoŭ dziaržavaŭ, jakija buduć na Krasnaj płoščy 9 maja. Usia jaho arhumientacyja ab tym, što jon pravodzić ułasny parad, z-za jakoha i nie moža pryjechać, vyhladaje śmiešna, tamu što na 60-hodździe Pieramohi jon pryjazdžaŭ u Maskvu, adsoŭvajučy na adnu ci dźvie hadziny mierapryjemstvy ŭ Minsku. Ciapier heta taksama možna było zrabić», - skazaŭ Suzdalcaŭ.
Na dumku palitołaha, heta rašeńnie - «udar nižej pojasa ŭ dačynieńni da Pucina» i svojeasablivaja pomsta za toje, što nie ŭdałosia atrymać kredyt u dva z pałovaj miljardy dalaraŭ ad Rasiei pierad vybarami.
