Mohiłki prybranyja da paminalnaha dnia. Fota z mohiłak vioski Pryłuki Bresckaha rajona.
Biełarusy rychtujucca da Radaŭnicy. Jaje śviatkujuć na 9-y dzień paśla Vialikadnia. Praŭda, u niekatorych miaścinach dzień paminańnia prodkaŭ tradycyjna prypadaje na Pravadnuju Niadzielu (pieršuju paśla Vialikadnia), Naŭski Čaćvier (pieršy paśla Vialikadnia — Naŭski aznačaje «niabožčykaŭ» ad «naviec» — «novy niabožčyk») ci na inšyja dni paśla Vialikadnia. U centralnych i paŭnočnych rehijonach Biełarusi zachavaŭsia zvyčaj paminalnaha abiedu kala mahiły.
Adnak što jadnaje biełarusaŭ niezaležna ad rehijona — heta abaviazkovaje paminańnie pamierłych uviesnu i ŭvosień.
Pierad Radaŭnicaj prybirajuć mohiłki, upryhožvajuć pomniki j mahiły.
Samo słova Radaŭnica pachodzić ad staroha bałckaha słova «raŭdaci» — «płakać, hałasić». Paraŭnajcie sa starasłavianskim «rydaci».
Radaŭnica — dziaržaŭnaje śviata, vychadny dzień u Biełarusi. My adzinaja kraina śvietu, dzie heta vychadny. Heta ŭnikalny i śvietły zvyčaj.
Pracoŭny dzień pierad Radaŭnicaj tradycyjna pieranosiać na inšy vychadny, kab ludzi mieli čatyry dni na pajezdki ŭ rodavyja vioski i na mohiłki.
