Homielski aktyvist Juryj Rubcoŭ, jaki abvinavačvajecca va ŭchileńni ad adbyvańnia pakarańnia, viečaram 13 krasavika budzie dastaŭleny ŭ śledčy izalatar u Baranavičach, paviedamiła pravaabaronca Anastasija Łojka.
«Ciapier jaho pieravoziać z Pružanskaha IČU, i ŭ Baranavičach jon budzie ŭžo siońnia viečaram», — skazała jana.
Aficyjnyja abvinavačańni Rubcovu byli vystaŭlenyja 9 krasavika. Na nastupnym tydni, skazała Łojka, homielski aktyvist i jaho advakat pačnuć znajomicca z materyjałami kryminalnaj spravy.
Dniom 6 krasavika Rubcoŭ byŭ dastaŭleny z papraŭčaj ustanovy adkrytaha typu ŭ vioscy Kuplin (Pružanski rajon Bresckaj vobłaści), dzie jon adbyvaŭ pakarańnie, u Pružanski rajonny adździeł Śledčaha kamiteta. Tam stała viadoma, što aktyvist abvinavačvajecca na padstavie art. 415 Kryminalnaha kodeksa (uchileńnie ad adbyvańnia pakarańnia ŭ vyhladzie abmiežavańnia voli). Rubcoŭ admoviŭsia ad pasłuh prapanavanaha jamu dziaržaŭnaha advakata i abviaściŭ haładoŭku. Jon taksama admoviŭsia ad davańnia pakazańniaŭ śledčamu Volzie Baradoŭskaj, jakaja viadzie jaho kryminalnuju spravu.
Nahadajem, 6 kastryčnika 2014 hoda sud Centralnaha rajona stalicy pryhavaryŭ 53-hadovaha Rubcova da dvuch z pałovaj hadoŭ abmiežavańnia voli z nakiravańniem u papraŭčuju ŭstanovu adkrytaha typu, adnak z ulikam amnistyi realny termin pakarańnia byŭ skaročany da paŭtara hoda. Rubcoŭ abvinavačvaŭsia ŭ źniavazie sudździ suda Savieckaha rajona Kiryła Pałulecha, jaki vioŭ u dačynieńni da jaho administracyjny praces paśla akcyi «Čarnobylski šlach» 28 krasavika 2014 hoda ŭ Minsku (art. 391 Kryminalnaha kodeksa).
