Alaksandru Milinkieviču i Taćcianie Ščytcovaj aficyjna paviedamlena pra toje, što jany nie prajšli pa konkursie na pasadu rektara.
Pryznačeńnie na pasadu rektara Jeŭrapiejskaha humanitarnaha ŭniviersiteta (EHU) amierykanca Devida Polika aficyjna paćvierdžana. Heta vynikaje ź lista mižnarodnaj rady kiraŭnikoŭ EHU, jaki atrymali lidar ruchu «Za Svabodu» Alaksandr Milinkievič i prafiesar EHU Taćciana Ščytcova — pretendenty na pasadu rektara.
Milinkieviču i Ščytcovaj aficyjna paviedamili ab tym, što jany nie prajšli pa konkursie na pasadu rektara. Pra heta Taćciana Ščytcova paviedamiła BiełaPAN, a Alaksandr Milinkievič — napisaŭ u «Fejsbuku». Paviedamleńnie padpisana staršynioj kirujučaj rady Danielem Taršysam i vice-staršynioj Denam Devidsanam.
U liście taksama paviedamlajecca, što rada kiraŭnikoŭ rekamiendavała, a ahulny schod zasnavalnikaŭ paćvierdziŭ pryznačeńnie prafiesara Devida Polika ŭ jakaści novaha rektara EHU.
Aficyjna pra heta pryznačeńnie budzie abvieščana najbližejšym časam.
Pretendentam na pasadu rektara vykazvajuć padziaku za ŭdzieł u intervju ŭ miežach konkursu na hetuju pasadu, a taksama za «kanstruktyŭnyja idei, pradstaŭlenyja padčas hutarki adnosna raźvićcia EHU i jaho hłybiejšaj intehracyi ŭ jeŭrapiejskuju i biełaruskuju adukacyjnuju prastoru».
Aficyjna pra abrańnie novaha rektara EHU nie abvieščana dahetul, choć ahulny schod zasnavalnikaŭ, jaki ŭchvaliŭ kandydaturu Polika, adbyŭsia 3 krasavika.