Čaćviortaja ekspazicyja vystavačnaha prajekta «Mastak i horad» pryśviečana tvorčaści adnaho sa znakavych biełaruskich mastakoŭ druhoj pałovy XX st. — Mikoły Sieleščuka.
Jak raspaviali ŭ Centry sučasnych mastactvaŭ, na pł. Jakuba Kołasa buduć pradstaŭleny repradukcyi 30 karcin z kalekcyj Nacyjanalnaha mastackaha muzieja, Muzieja sučasnaha vyjaŭlenčaha mastactva, Biełaruskaha sajuza mastakoŭ, Mahiloŭskaha abłasnoha mastackaha muzieja imia. P.V. Maślenikava i pryvatnych kalekcyj.
«Mikoła Sielaščuk — jarki samabytny mastak. Jaho tvorčaść jašče da kanca nie asensavanaja. Pajšoŭ z žyćcia, kali jamu nie spoŭniłasia 50 hadoŭ. Mnohija jaho pracy znachodziacca ŭ pryvatnych kalekcyjach, heta značyć nie dastupnyja šyrokamu kołu. Prajekt «Mastak i horad» daść mahčymaść ubačyć niekatoryja ź ich», — kaža dyrektar Centra sučasnych mastactvaŭ Natalla Šaranhovič.
Mikoła Sielaščuk — hrafik, ilustratar, žyvapisiec, prykmietnaja fihura škoły biełaruskaha siurrealizmu. Pracy mastaka nie adnarazova adznačanyja na respublikanskich i mižnarodnych konkursach vyjaŭlenčaha mastactva. Łaŭreat Dziaržaŭnaj premii Respubliki Biełaruś. Trahična pajšoŭ z žyćcia ŭ 1996 hodzie.
Nahadajem, vystavačny prajekt «Mastak i Horad» čaćviorty hod zapar realizujecca ŭ Minsku pry padtrymcy Ministerstva kultury Respubliki Biełaruś i Minskaha haradskoha vykanaŭčaha kamiteta. Papiarednija ekspazicyi, pradstaŭlenyja na pł. Jakuba Kołasa, znajomili z tvorčaściu Marka Šahała, Kazimira Maleviča i sučasnych biełaruskich žyvapiscaŭ i hrafikaŭ.
Sioleta inicyjatarami vystavačnaha prajekta vystupili ahienctva sacyjalnaha markietynhu Grand BS i Centr sučasnych mastactvaŭ. A hienieralnym partnioram druhi hod zapar staŭ bank VTB. Infarmacyjnyja partniory: ahienctva «Minsk-Naviny», haradski časopis «Bolšoj» i partał Relax.by.
Vystava budzie pracavać z 14 maja pa 10 vieraśnia.
