Z pačatku 2015 hoda zapraŭki A-100 pierajšli na biełaruskuju movu absłuhoŭvańnia klijentaŭ. Eks-supracoŭnik sietki Andrej raspavioŭ Onliner.by pra prablemy, źviazanyja ź inicyjatyvaj.
Pa słovach Andreja, moŭnaja padrychtoŭka supracoŭnikaŭ skłała sumarna 6 hadzin. «Ci hetaha dastatkova, kab patrabavać z nas padtrymlivać dyjałoh z klijentam i vyrašać kanfliktnyja situacyi? Ja liču, heta cyrk», — kaža jon.
Andrej skardzicca, što niekatoryja klijenty nie saromiejucca dastavać telefon i zdymać supracoŭnikaŭ, jakija «niaŭmieła razmaŭlajuć pa-biełarusku, pieraŭtvarajučy pryhožuju movu ŭ trasianku». Taksama klijenty pakidajuć skarhi, bo nie mohuć zrazumieć, što takoje, naprykład, «kava ź viarškami».
Za nievykanańnie standartaŭ biełaruskamoŭnaha absłuhoŭvańnia supracoŭnikaŭ pazbaŭlajuć premii na 4%. Ale, pa słovach Andreja, bolšaść supracoŭnikaŭ praciahvajuć razmaŭlać pa-rusku — za vyklučeńniem zapraŭki na Baravoj, dzie raźmiaščajecca ofis kiraŭnictva i «vialikaja imaviernaść narvacca na načalnika».
Na dumku Andreja, «hvałtoŭnaje naviazvańnie — heta absurd i dyskredytacyja idei».
Kožny supracoŭnik volny abirać movu, na jakoj budzie pracavać, kažuć u A-100.
Kiraŭnik upraŭleńnia markietynhu A-100 Nina Nikanorava adkazała, što nie bačyć sensu ŭ kamientavańni mierkavańnia pryvatnaj asoby, «jakoje bolš padobnaje da kryŭdy».
Pavodle jaje słoŭ, prajekt dabraachvotny — raspracavanaja sistema dadatkovaha hrašovaha zaachvočvańnia za vykarystańnie biełaruskaj movy ŭ pracy.
Stanoŭčych vodhukaŭ ad klijentaŭ stała značna bolš, kaža Nikanorava, a kolkaść skarhaŭ nie pavialičyłasia. Ale papiaredniaja acenka prajektu «biełarusizacyi» A-100 budzie dadzienaja tolki pa vynikach 2015 hoda.
