U biełaruskaha «MTBanka» źmianiŭsia skład akcyjanieraŭ.
Jak paviedamili ŭ banku, zaviaršyłasia ździełka pa nabyćci 100% akcyj chołdynhavaj kampanii MTB Investments (Kipr), jakoj, u svaju čarhu, naležyć 98,97% akcyj ZAT «MTBank». Kančatkovymi bienieficyjarnymi ŭłaśnikami banka stali biełaruski biźniesmien Alaksiej Aleksin i Iryna Aleksina.
Akcyi nabytyja ŭ raniejšych bienieficyjarnych ułaśnikaŭ — struktur biełaruskaj inviestycyjnaj kampanii «Zubr Kapitał», zasnavanaj akcyjanierami mižnarodnaha aŭtamabilnaha chołdynha «Atłant-M», i amierykanskaha inviestycyjnaha fondu Horizon Capital.
Jak zajaviŭ staršynia praŭleńnia ZAT «MTBank» Andrej Žyškievič, prychod novaha akcyjaniera dazvolić banku «pieraadoleć abjektyŭnyja abmiežavańni raniejšaha pieryjadu raźvićcia, kali dalejšy arhaničny rost banka pačaŭ strymlivacca pamieram isnujučaha kapitału, a kapitał ros tolki za košt samakapitalizacyi. Nie mienš pryjemna, što novym akcyjanieram staŭ biełaruski biźniesmien, što dazvalaje «MTBanku» zachavać svoj ciapierašni status najbujniejšaha pryvatnaha banka, jaki kantralujecca mienavita nacyjanalnym inviestaram».
U svaju čarhu novyja akcyjaniery adznačyli nastupnaje: «Nabyćcio «MTBanka» źjaŭlajecca važnym krokam pa dyviersifikacyi biźniesu, jaki na siońnia pradstaŭleny ŭ Biełarusi ŭ halinach naftapierapracoŭki, sielskaj haspadarki, budaŭničaj haliny. Pry acency banka asablivaja ŭvaha nadavałasia najaŭnaściu dakładnaj i zbałansavanaj stratehii raźvićcia».
«Aryjentacyja «MTBanka» na absłuhoŭvańnie biełaruskaha małoha i siaredniaha biźniesu i fizičnych asob dakazała svaju efiektyŭnaść i biezumoŭna zachavajecca. U cełym my płanujem zabiaśpiečyć maksimalnuju pierajemnaść isnujučaj biźnies-madeli i zachavać i pašyryć supracoŭnictva z usimi ciapierašnimi i budučymi partniorami «MTBanka», — zaznačyli novyja akcyjaniery.
Pieršymi krokami stanuć pavieličeńnie statutnaha fondu banka na 15 młrd. rubloŭ, praviadzieńnie ŭ najbližejšy čas maštabnaj akcyi dla klijentaŭ — fizičnych asob.
Andrej Žyškievič vykazaŭ padziaku raniejšym akcyjanieram banka. Chołdynh «Atłant-M» nabyŭ «MTBank» u 2001 hodzie. Z taho momantu aktyvy banka pavialičylisia ŭ dziasiatki razoŭ. Klijentami banka stali mnohija biełaruskija kampanii małoha i siaredniaha biźniesu. U svaju čarhu z prychodam Horizon Capital prykmietna aktyvizavałasia supracoŭnictva ź mižnarodnymi finansavymi arhanizacyjami — było pryciahnuta bolš za 80 młn. dołaraŭ ad takich arhanizacyj, jak EBRD, IFC, FMO.
