Pieršuju ŭ Biełarusi stancyju ekspres-zaradki dla elektramabilaŭ adkryjuć 9 kastryčnika na vyjeździe ź Minska (łahojski napramak), paviedamili arhanizatary mierapryjemstva.
Stancyja ekspres-zaradki daść mahčymaść zaradzić akumulatar elektramabila ŭsiaho za 30 minut, što ŭ 12 razoŭ pieravysić mahčymaści niekalkich stancyj, što znachodziacca ŭ Minsku. Novy ŭniviersalny kompleks ekspres-zaradki adpaviadaje standartu CHAdeMO. Heta standart chutkaj zaradki batarei elektratranspartu pastajannym tokam praź śpiecyjalny razdym, jaki raspracavany śpiecyjalna dla elektramabilaŭ masavaj vytvorčaści. Mahutnaść zaradki składaje 50 kVt.
Pavodle słoŭ arhanizataraŭ, rašeńnie adkryć ekspres-stancyju na vyjeździe ź Minska, pobač z bujnym handlovym centram, było pryniata z ulikam stanoŭčaha zamiežnaha vopytu. Va ŭsim śviecie punkty zaradki ŭstanaŭlivajucca ŭ miescach z najbolšaj kolkaściu ludziej, a adpaviedna i aŭtamabilaŭ: pobač z handlova-zabaŭlalnymi centrami, spartyŭnymi zbudavańniami, administracyjnymi budynkami, centralnymi płoščami, a taksama na darohach i mahistralach ź intensiŭnym trafikam. «U Biełarusi ŭžo jość niekalki aŭtamabilaŭ, jakija zapraŭlajucca elektryčnaściu. My ŭpeŭnieny, što źjaŭleńnie ŭ respublicy sučasnaha kompleksu ekspres-zaradki pavialičyć popyt u biełarusaŭ na «zialonyja» aŭtakary», — raskazali arhanizatary.
U lik elektrakaraŭ masavaj vytvorčaści, jakija zmohuć zaradzicca na ekspres-stancyi biez dadatkovaha abstalavańnia, uvachodziać Kia Soul EV, Nissan e-NV200, Mitsubishi Outlander PHEV, Peugeot Partner, Mitsubishi Minicab-MiEV Truck, Honda Fit EV, Mazda Demio EV, Mitsubishi Minicab-MiEV, Citroen Berlingo, Nissan Leaf, Citroen C-Zero, Peugeot iON, Mitsubishi i-MiEV, Toyota eQ, Subaru Plug-in Stella, BD Otomotive eFiorino, BD Otomotive eTrafic Panel Van, BD Otomotive eKangoo Passenger. Ekskluziŭnyja elektramabili, a taksama tyja, što vypuskajucca abmiežavanymi sieryjami z pryčyny svajoj darahoŭli i ŭ suviazi z hetym niedastupnaści dla pakupnika ź siarednim dastatkam, naprykład Tesla Model S, zmohuć zaradzicca tolki pry najaŭnaści śpiecyjalnych pierachodnych razdymaŭ CHAdeMO.
