U minskim Pałacy sportu adbyŭsia kancert lehiendarnaj «Mašyny času» ŭ ramkach turu da 45-hodździa hurta. Minskaja publika vitała apalnaha Makareviča.
Niahledziačy na vysoki košt (da 1.400.000 rub), usie kvitki byli raspradadzienyja.
Tysiačy čałaviek stajali ŭ čarzie da ŭvachodu. Kožnaha praviarali metałašukalnikami, prahladali asabistyja rečy.
Takija miery biaśpieki źviazanyja z apošnimi padziejami ŭ Rasiei, kali Makareviča pačali ckavać prychilniki Pucina za aktyŭnuju praŭkrainski pazicyju, a na adnym z kancertaŭ navat raspylili piarcovy haz.
U doŭhaj čarzie, jakuju składali pieravažna tyja, kamu za 40, bydo čuvać razmovy pra palityku, pra Ukrainu.
Makarevič z hrupaj pavitaŭ publiku, skazaŭ, što Minsk — adzin z samych lubimych haradoŭ. Uvohule, kazaŭ redka, bolš śpiavaŭ. Pačaŭ ź piesień apošnich hadoŭ, chity pakinuŭ na kaniec kancertu.
Voś Makarevič zaśpiavaŭ: «Jaŝik vas puhajet každyj čas», i dadaŭ ad siabie: «A u nas-to kak puhajet!..».
Niekalkitysiačnaja aŭdytoryja vybuchnuła apładysmientami i śvistam, a Makarevič praciahnuŭ:
«A ja ustał bojaťsia. Stracha bolšie niet…».
Muzyki vykanali pieśniu «Pacuki». Jana źjaviłasia jašče ŭ 2012 hodzie, ale asabliva šyroka razyšłasia pa sacyjalnych sietkach z pačatkam rasiejska-ŭkrainskaha kanfliktu. Mnohija słuchačy zrazumieli pieśniu Andreja Makareviča jak zvarot da Pucina:
«Piervośviaŝieńnik i hłavnyj sud́ja
Vziali mienia v oborot
Odin kričał «ty nie lubiš stranu»
Vtoroj «ty nie lubiš narod»
Karystalniki internetu ŭžo prazvali jaje «pieśniaj pra Pucina», zrešty, sam Makarevič nie admaŭlaje i nie paćviardžaje, kaža, što kožny ŭ hetym tvory bačyć svajo.
Publika aktyŭna reahavała na pieśni, zapisanyja «Mašynaj času» jašče ŭ savieckija časy, niekatoryja ŭ partery sprabavali ŭstavać ź miescaŭ i tancavać, ale achoŭniki ŭ čornych kaściumach padbiahali i sadžali asabliva «hareźlivych» na miesca.
Padčas vykanańnia na bis, u zale zapalilisia sotni lichtarykaŭ mabilnych telefonaŭ.
Jak i napiaredadni ŭ Viciebsku, z kvietkami da Makareviča nikoha nie padpuskali, ich pieradavali praz achoŭnikaŭ. Znoŭ ža — u metach biaśpieki.
